മലയാളസംഗീത വിജ്ഞാനകോശം

സംഗീത സാഹിത്യസൂചിക

2011-12-01T19:53:00.000-07:00

കഴിഞ്ഞ ഒരു വര്‍ഷത്തിലെ ഏറ്റവും പ്രധാനപ്പെട്ട ഒരു പുതുമ എം എസ് ഐയില്‍ ഇന്ന് മുതല്‍ കാണാനാകും.

സംഗീതത്തിന്‍റെ സാഹിത്യം എന്നും ഏറെ ചര്‍ച്ച ചെയ്യപ്പെടുന്ന ഒരു കാര്യമാണല്ലോ? ഗാന/സിനിമാ സാഹിത്യത്തിലെ പലതരം ഫീച്ചറുകള്‍ പലപ്പോഴായി എം എസ് ഐ / എം എം ഡി ബി യില്‍ ചേര്‍ത്തുവരുന്നു. ഇവയെല്ലാം കോര്‍ത്തിണക്കി അത്തരം സൂചികകളുടെ ഒരു ശേഖരം തയ്യാറാക്കാന്‍ ശ്രമിക്കുകയാണ് 'സംഗീത സാഹിത്യ സൂചിക' സംരംഭത്തിലൂടെ.

ഇതിലെ ഓരോ സൂചികയ്ക്ക് പിന്നിലും ഓരോ കഥയുണ്ട്. മലയാളഗാനങ്ങള്‍ , മലയാളസംസ്കാരത്തെ പോലെ തന്നെ വളരെയധികം പരിണാമങ്ങളിലൂടെ കടന്നു പോയിക്കൊണ്ടിരിക്കുന്ന ഈ അവസരത്തില്‍, സിനിമയിലേയും ഗാനങ്ങളിലേയും എഴുതപ്പെടുന്ന വാക്കുകള്‍ ശ്രദ്ധിക്കുന്നവര്‍ക്കായാണ് 'സാഹിത്യസൂചിക'

ഇപ്പോള്‍ പ്രസിദ്ധീകരിക്കുന്ന 10 സൂചികകള്‍ ഇവയെല്ലാം:

1: മലയാളസിനിമകളുടെ ആദ്യകാലങ്ങളില്‍ കൂടുതലും നോവലുകളും, ചെറുകഥകളും, നാടകങ്ങളുമായിരുന്നു സിനിമകള്‍ക്ക്‌ പ്രചോദനം. ഇവയെ കുറിച്ചുള്ള ഒരു ഡാറ്റാബേസ് ഇന്ന് എം എം ഡി ബി യില്‍ ലഭ്യമാണ്

2: സിനിമകളുടെ മൂലകഥ എവിടെ നിന്നു വരുന്നു എന്നറിയാന്‍ ഉതകുന്ന ഒരു പട്ടികയും ഇതിന്‍റെ കൂടെയുണ്ട്

3: സംഗീത/സിനിമാ സാഹിത്യം - സംഗീതത്തേയും സിനിമയേയും കുറിച്ചുള്ള പുസ്തകങ്ങള്‍ ഇന്നു വിപണിയില്‍ ലഭ്യമാണ്. ലഭ്യമായതും അല്ലാത്തതുമായ പല പുസ്തകങ്ങളെ കുറിച്ചുമുള്ള ഒരു വിജ്ഞാനകോശം ഞങ്ങള്‍ ഇവിടെ കാഴ്ചവയ്ക്കുന്നു.

4: മലയാള സിനിമകള്‍ക്ക്‌ വേണ്ടി പാട്ടുകള്‍ എഴുതിയിട്ടുള്ള കവികളും രചയിതാക്കളും ഏതൊക്കെ പാട്ടുകളെഴുതി എന്ന്‍ അറിയാനുള്ള സംവിധാനം.

5: മലയാളസിനിമയുടെ ആദ്യകാലം മുതല്‍ ഒരു മുപ്പത്‌ വര്‍ഷം മുന്‍പ്‌ വരെ സജീവമായിരുന്നു പാട്ടുപുസ്തകങ്ങള്‍. ഇത്തരത്തിലുള്ള അമൂല്യമായ 800 ഓളം പാട്ടുപുസ്തകങ്ങള്‍ എം എസ് ഐയില്‍ ഉണ്ട്.

6: കവികളെ അടുത്തറിയാന്‍ കവിപരിചയം. എം എസ് ഐയിലെ സജീവമായ എഴുത്തുകാര്‍ ഗവേഷണങ്ങള്‍ക്ക്‌ ശേഷം എഴുതുന്ന ഈ പംക്തി ഇപ്പോഴും വളര്‍ന്നുകൊണ്ടിരിക്കുന്നു.

7: സാധാരണ പ്രേക്ഷകര്‍ക്ക്‌ വായിക്കാനും ആസ്വദിക്കാനുമായി എം എം ഡി ബിയില്‍ സിനിമാ അവലോകനങ്ങള്‍ ധാരാളം ചേര്‍ത്തുകഴിഞ്ഞിരിക്കുന്നു. അവയെല്ലാം ഈ സൂചിക വഴി ലഭ്യമാണ്.

8: മലയാളത്തില്‍ സിനിമകള്‍ക്കായി എഴുതപ്പെട്ടിട്ടുള്ള വരികള്‍ ഏതു വേണമെങ്കിലും ഇനി എം എസ് ഐയില്‍ തിരയാം.

9: നാടക ഗാനങ്ങളുടെ ഒരു ശേഖരം അടുത്ത കാലങ്ങളില്‍ എം എസ്‌ ഐയില്‍ തുടങ്ങിയിരുന്നു. ഇതിലൂടെ മലയാള സിനിമാ ഗാനങ്ങളുടെ ഉറവിടവും ഉത്തേജനവും അറിയാനാവും. മുന്നോട്ടെന്ന പോലെ ഗാന സാഹിത്യത്തില്‍ പഴയ കാലത്തേക്കുള്ള തിരിച്ചു പോക്കും എം എസ്‌ ഐയില്‍ സജീവമായി നടക്കുന്നതിന്‍റെ തെളിവാണ് ഈ സംരംഭം

10. ഏതൊരു ചിത്രത്തിന്‍റെ വിജയത്തിന്‍റെ പിന്നിലും ഒരു ശക്തമായ തിരക്കഥ ഉണ്ടായിരിക്കും. മലയാള സിനിമകളിലെ തിരക്കഥകൃത്തുകളെ പരിചയപ്പെടാന്‍ ഒരവസരം

വാദ്യഘോഷങ്ങളുടെ ശബ്ദ കോലാഹലങ്ങള്‍ക്കിടയില്‍ ശ്രദ്ധിക്കപ്പെടാതെ പോകുന്ന ഗാനസാഹിത്യത്തിനും, കെട്ടുറപ്പില്ലാത്ത പറഞ്ഞു മടുത്ത കഥകള്‍ക്കിടയില്‍ ഒളിഞ്ഞു കിടക്കുന്ന ആ ഒരു നല്ല കഥയ്ക്കുമായി ഞങ്ങള്‍ ഇത് സമര്‍പ്പിക്കുന്നു.

മുകളില്‍ പറയുന്ന എല്ലാ സൂചികകളിലും തുടര്‍ന്നും സഹായം ആവശ്യമാണ്‌ . നിങ്ങള്‍ക്ക് സഹായിക്കാന്‍ താല്‍പര്യവും സമയവും ഉണ്ടെങ്കില്‍ ഞങ്ങളുമായി ബന്ധപ്പെടുക

ഇനിയും ധാരാളം സാഹിത്യസൂചികകള്‍ എം എസ് ഐയില്‍ പ്രതീക്ഷിക്കാം.

മലയാളഗാന വര്‍ഗ്ഗീകരണം

2011-11-26T20:02:00.004-07:00

വര്‍ഷങ്ങളായി എം എസ് ഐയില്‍ മലയാള ഗാനങ്ങളെ തരം തിരിച്ചു വരുന്നു. ഈ ഗാനങ്ങളുടെ വര്‍ഗ്ഗീകരണം ഞങ്ങള്‍ക്ക് ഏറ്റവും അധികം കിട്ടുന്ന ഒരു ചോദ്യങ്ങളില്‍ ഒന്നാവണം.

ഓണക്കാലത്ത് ഓണപ്പാട്ടുകളും ക്രിസ്തുമസ് കാലത്ത് ക്രിസ്തീയ ഗാനങ്ങളും തുടങ്ങി ഏതു കാലത്തിനും ഭാവത്തിനും അനുസരിച്ച് പാട്ടുകളുമുണ്ടല്ലോ ? ഇതിനകം മലയാളത്തിലെ 10 ,000 പാട്ടുകളോളം ഞങ്ങള്‍ തരം തിരിച്ചു കഴിഞ്ഞു. ഇനിയും വര്‍ഗ്ഗീകരിക്കേണ്ടത് ഏകദേശം 25 ,000 ഗാനങ്ങള്‍ . ഇതിനു ഞങ്ങളെ സഹായിക്കാനാവുന്നവര്‍ admin@malayalasangeetham.info എന്ന വിലാസത്തില്‍ ബന്ധപ്പെടുക

ഓരോ ഗാനസ്നേഹിയുടെയും ഗാനാസ്വാദനം ഒരു പുതിയ തലത്തില്‍ എത്താന്‍ ഈ വര്‍ഗ്ഗീകരണം സഹായിക്കുമെന്ന് ഞങ്ങള്‍ കരുതുന്നു

ഇത് വരെ തരം തിരിച്ചു കഴിഞ്ഞ ഗാനങ്ങള്‍ ഇവിടെ കാണാം

ദേവരാജസംഗീതം-ചില വീണ്ടുവിചാരങ്ങൾ

2011-11-22T15:00:00.002-07:00

Devaraja Sangeetham

Sa-Pa-Sa: A book on music

2011-11-22T08:27:00.007-07:00

This book covers most of the essential information about classical music. The book is divided into 5 segments. Each segment is reinforced at the end with a question-answer session and a recap in the continuing segment with nibbles of new information percolating into the novice's mind effortlessly. Apart from Indian classical music which is its main area of study, the book also sketches a brief account of the folk music and other prevalent music systems in India.

It is a slim volume of about 90 pages.

The author can be reached at kalasasikumar1@gmail.com

മലയാള നാടകസംഗീതം ഡാറ്റാബേസ്

2011-11-15T19:48:00.004-07:00

മലയാളത്തില്‍ , സിനിമകള്‍ക്ക്‌ വളരെ മുന്‍പേ - പത്തൊന്‍പതാം നൂറ്റാണ്ടിന്‍റെ അവസാനത്തില്‍ - തുടങ്ങിയ ഒരു ശാഖയാണ്‌ നാടകങ്ങള്‍ - ആ നാടകങ്ങളില്‍ താമസിയാതെ ഗാനങ്ങളായി - സംഗീത നാടകങ്ങള്‍ - . കാലമേറെ ചെന്നപ്പോള്‍ ഈ നാടക ഗാനങ്ങള്‍ ചലച്ചിത്രങ്ങളിലെ ഗാനങ്ങള്‍ക്ക് പ്രചോദനമായി മാറുകയും ചെയ്തു .

എം എസ് ഐയില്‍ നാടക ഗാനങ്ങള്‍ ചേര്‍ക്കാന്‍ ഇവിടെയുള്ള പലരും കുറച്ചു മാസങ്ങളായി പരിശ്രമിച്ചു വരുന്നു . അതിന്റെ ഫലമാണ് എം എസ് ഐയിലെ ഈ പുതിയ ഡാറ്റാബേസ് - നാടകസംഗീതവും അതിന്‍റെ ചരിത്രവും ഉള്‍ക്കൊള്ളുന്ന ഈ പ്രോജക്റ്റ് ഇവിടെ തുടങ്ങുന്നു..

കെ പി എ സി യും കാളിദാസ കല കേന്ദ്രവുമെല്ലാം ഇന്നത്തെ എം പി 3 യുഗത്തില്‍ പുതിയ തലമുറയ്ക്ക് പരിചയപ്പെടുത്തേണ്ട കാര്യമില്ല . എം എസ് ഐയില്‍ ഇവയെ കുറിച്ചെല്ലാം വിവരങ്ങള്‍ ഉണ്ടെങ്കിലും അതിനപ്പുറമുള്ള നാടകങ്ങളും നാടക ഗാനങ്ങളുമാണ് ഞങ്ങളുടെ ശ്രദ്ധാകേന്ദ്രം .

ഇതിനു വേണ്ടി പ്രവര്‍ത്തിച്ച സംശയാലു , ജിജാ , ഇന്ദു തുടങ്ങിയ എല്ലാവര്‍ക്കും എം എസ് ഐ ആസ്വാദകരുടെ ഒരു കൂപ്പുകൈ

ഈ ഡാറ്റാബേസ് കാണാന്‍ ഇവിടെ നോക്കുക . വരും ദിനങ്ങളില്‍ ഈ ഗാനങ്ങളെ കുറിച്ച് കൂടുതല്‍ വിവരങ്ങള്‍ എം എസ് ഐയില്‍ കാണാം

അനശ്വരതയിലേക്ക് ഈ നാദം

2011-10-21T06:17:00.000-07:00

Essay 9

സാഹിത്യകാരന്‍ കാക്കനാടന്‍ അന്തരിച്ചു

2011-10-20T06:03:00.001-07:00

kakkanadan HK

'ആ ഗാനങ്ങള്‍ ഒരായിരം നക്ഷത്രങ്ങളായി

2011-10-19T06:47:00.001-07:00

Jagjit Singh by Bhasi

Sreemoolanagaram Mohan

2011-10-11T12:36:00.000-07:00

SMG

നെറ്റിലെ മുളം തണ്ടില്‍ പാട്ടിന്റെ പാലാഴി

2011-10-08T07:36:00.001-07:00

Metrovaartha Life Page-malyalasangeetham

ഓര്‍ക്കുക വല്ലപ്പോഴും

2011-10-08T02:44:00.000-07:00

kanmasi

യേശുദാസ് എന്ന അതിശയം

2011-09-27T23:56:00.000-07:00

Yesudas

ദാസ് ക്യാപ്പിറ്റൽ - 3

2011-09-24T20:56:00.000-07:00

dascapital_3

ദാസ് ക്യാപ്പിറ്റൽ - 2

2011-09-24T20:50:00.000-07:00

Das Capital Part 2

ദാസ് ക്യാപ്പിറ്റൽ - 1

2011-09-24T20:41:00.000-07:00

Das Capital Part 1

സ്വർണ്ണമുകിലിൻ ചിറകിലേറിപ്പോയ സ്നേഹിതൻ

2011-09-24T08:59:00.005-07:00

swarnamukilin

സംഗീതത്തിലും വേണം ബഹുസ്വരത

2011-09-18T00:33:00.000-07:00

sangeethathilum

എം.എസ്.ഐക്ക് ശ്രീ.എം.ഡി.രാജേന്ദ്രന്റെ ആശംസ....

2011-09-11T09:06:00.003-07:00

എം.ഡി.രാജേന്ദ്രന്റെ പാട്ടുകൾ എം.എസ്.ഐയിൽ

എം എസ്സ്‌ ഐയ്ക്ക് ഡാനി സെബാസ്റ്യന്റെയും മഞ്ജുഷ മോഹന്‍ ദാസിന്റെയും ആശംസകള്‍(IDEA STAR SINGER SEASON 4)

2011-09-07T09:12:00.002-07:00

പൊട്ടിത്തകർന്ന കിനാവുകൾ

2011-08-07T22:08:00.002-07:00

Potti thakarnna kinavukal

തന്ത്രികൾ പൊട്ടിയ തംബുരുപോലെ

2011-08-07T22:05:00.000-07:00

Thanthrikal pottiya thamburu

നായരെ കണ്ടാൽ മുറുമുറുക്കുന്ന ക്രിസ്ത്യാനി...

2011-08-05T07:44:00.000-07:00

malayala_cinemayile

കാറ്റു വന്നു നിന്റെ കാമുകൻ വന്നു...

2011-08-02T23:01:00.000-07:00

GK Pallath

അരാജകവാദിയുടെ അമ്മു

2011-08-01T12:41:00.001-07:00

File

എം.എസ്.ഐക്ക് ശ്രീ. ജി.വേണുഗോപാലിന്റെ ആശംസ

2011-07-31T21:43:00.000-07:00

പാട്ടു പൂത്തുലഞ്ഞ കൊച്ചി

2011-07-25T11:05:00.001-07:00

paattu_poothulanja_kochi

പാട്ടു സർക്കീട്ടുകൾ

2011-07-22T02:31:00.000-07:00

Paattu sarkkeettukal

സംഗീതത്തിന്റെ സുൽത്താൻ

2011-07-22T02:21:00.002-07:00

Sangeethathinte sulthan

Anuraaga Ganam Pole...

2011-07-14T21:18:00.001-07:00

അനുരാഗ ഗാനം പോലെ..">Anuraga ganam

Aa Gaanam Maathram Hridayathil

2011-07-14T20:57:00.002-07:00

ആ ഗാനം മാത്രം ഹൃദയത്തിൽ..
">Janakiyammayute Paattu

മിന്നാമിനുങ്ങ് : ബാബുക്കാക്ക് വിവാഹസമ്മാനം

2011-07-05T19:53:00.000-07:00

Minnaminungu : Babukkakk Vivahasammanam

രവീന്ദ്രന്‍റെ സഞ്ചാരങ്ങള്‍

2011-07-05T13:29:00.001-07:00

Raveendrante Sancharangal

ഗ്രാമഫോണ്‍ വീണ്ടും .....വര്‍ഷങ്ങള്‍ക്കു ശേഷം ഇതാ...

2011-07-01T06:01:00.003-07:00

ആ ഗാനം മാത്രം ഹൃദയത്തിൽ....

2011-06-24T01:14:00.000-07:00

Babukkayude_Yesudas

Sathyan the actor and the person in the eyes of Cameraman Krishnankutty

2011-06-22T04:04:00.000-07:00

.
.

ഘനശ്യാമസന്ധ്യാ‍മേഘമായ് : എം.ജി.രാധകൃഷ്ണൻ സ്മൃതി

2011-06-20T21:03:00.002-07:00

Oru Nastha Vasantham

2011-06-17T04:48:00.006-07:00

This article by Remitha Satheesh was first published in Yentha.com

Oru_Nashta_Vasantham

നാവടക്കൂ പണിയെടുക്കൂ

2011-06-14T21:02:00.001-07:00

ശ്രീജുവിന്റെ ഗാന ഗവേഷണത്തിലൂടെ ഒരു പുതിയ വിവരം കൂടി..
നാവടക്കൂ പണിയെടുക്കൂ എന്ന ചിത്രത്തിലെ ഗാനരചന മറ്റൊരാളുടെ പേരിലായിരുന്നു ഇതുവരെ. ഇതിലൂടെ മറ്റൊരു വനിതാ ഗാനരചയിതാവിന്റെ പേരു കൂടി രേഖപ്പെടുത്തുകയാണ്. മാവേലിക്കര ദേവമ്മ...
തെളിവ് ഇവിടെ.....

നാവടക്കു പണിയെടുക്കുവിന്റെ ഗ്രാമഫോൺ റെക്കോർഡ് സൈഡ് 2

നാവടക്കു പണിയെടുക്കുവിന്റെ ഗ്രാമഫോൺ റെക്കോർഡ് സൈഡ് 1

നാവടക്കു പണിയെടുക്കുവിന്റെ ഗ്രാമഫോൺ ക്രെഡിറ്റ് ലേബൽ

എം എസ് ഐക്ക് ബേണി ഇഗ്നേഷ്യസിന്റെ ആശംസ

2011-06-06T05:44:00.004-07:00

From: Berny PJ
Date: Sun, Jun 5, 2011 at 2:52 AM

WISHES TO MALAYALASANGEETHAM .INFO

We often visit the site,malayalasangeetham.info.The site is very informative and useful,of course an asset to the music industry and music lovers.It is a blessing to the crew working for the production of malayalam film songs.

We wish all the best for the success of the site.

Musically yours,

BERNY IGNATIUS
(Music Directors)
Puthenveettil house Kathrikadavu
Kaloor P.O.
Kochi - 682017 South India

V K Sasidharan

2011-05-31T07:42:00.000-07:00

VKS_ArtistoftheMonth

ബാബു അണ്ണന്‍ ഒരു സിനിമാ ഹീറോ

2011-05-17T06:37:00.001-07:00

Babu Annan

ഒരു പഴയ ചിത്രം

2011-05-05T08:10:00.002-07:00

"നമ്മുടെ കൃഷ്ണേട്ടന്റെ ചിത്രശേഖരത്തില്‍ നിന്ന് ഒരു അപൂര്‍വചിത്രം. കൃഷ്ണേട്ടന്റെ അച്ഛന്‍, വയലാര്‍, പി കെ ശിവദാസ് എന്നിവര്‍ . ബിന്ദു,,,, ബിന്ദു.... ഒതുങ്ങിനിൽ‌പ്പൂ നിന്നിലൊരുൽക്കടശോകത്തിൻ സിന്ധു..... എന്ന ഗാനത്തിന്റെ രചയിതാവാണ് ശിവദാസ്....."

Pazhaya Chitram

വെള്ളനാട് നാരായണന്‍

2011-05-05T06:21:00.003-07:00

എണ്‍പതുകളില്‍ കൌമാരമനസ്സുകളെ ഒട്ടേറെ സ്വാധീനിച്ച ഒരു ഗാനമാണ് നിന്നെ പുണരാന്‍ നീട്ടിയ കൈകളില്‍ വേദനയോ... എന്ന യേശുദാസ് ഗാനം. ‘സരസ്വതീയാമം എന്ന ചിത്രത്തിലെ ഈ ഗാനം ഒട്ടേറെ നിരാശകാമുകന്മാര്‍ക്ക് നഷ്ടപ്രണയത്തിന്റെ തീവ്രനൊമ്പരത്തിന് രൂപവും ഭാവവും പകരാന്‍ പ്രചോദനമായി. ജീവിതത്തിന്റെ അനന്തയാത്രാപഥങ്ങളില്‍ ഇടയ്ക്കെങ്കിലും ഈ ഗാനം മനസ്സിലേക്ക് കടന്നുവരാറുണ്ട്. ഈ ഗാനത്തിന്റെ രചയിതാവിനെ അന്വേഷിച്ചുള്ള ഒരു യാത്രയുടെ വിശേഷങ്ങളിലേക്ക്. വെള്ളനാട് നാരായണന്‍ എന്ന മനുഷ്യനിലേക്ക്. ജീവിതത്തിന്റെ കാഴ്ചപ്പാടുകളിലേക്ക്.

ചെമ്മണ്ണു നിറഞ്ഞ പാതയിലൂടെ കരി നിറച്ച് കത്തിച്ച് ഓടുന്ന നീളന്‍ മൂക്കുള്ള ബസ്സിനു പിന്നാലെ അല്‍ഭുതത്തോടെ കൂക്കിവിളിച്ചോടിയിരുന്ന കുറുമ്പന്‍ പിള്ളാരില്‍ ഒരുവന്‍ . വെള്ളനാട് എന്ന കുഗ്രാമത്തില്‍ നിന്ന് ഒന്‍പത് കിലോമീറ്റര്‍ കയറ്റിറക്കങ്ങള്‍ കയറി നെടുമങ്ങാട് ഹൈസ്കൂളില്‍ ചെന്നു പഠിച്ചു. അവന്റെ നാട്ടിന് കലയോടും സാഹിത്യത്തോടും പൊക്കിള്‍ക്കൊടി ബന്ധം ഉണ്ടായിരുന്നു. ഇരുന്നൂറുവര്‍ഷങ്ങളായി മുടങ്ങാതെ കഥകളി നടക്കുന്ന അമ്പലപ്പറമ്പുണ്ടായിരുന്നു. ഇരുന്നൂറുവര്‍ഷം മുന്‍പ് സ്ഥാപിച്ച സഹൃദയ കലാസമിതി ഉണ്ടായിരുന്നു. തിരുവനന്തപുരം ജില്ലയിലെ ഏറ്റവും വലിയ പബ്ലിക് ലൈബ്രറിയും ഉണ്ടായിരുന്നു. അവിടെ അവന്‍ പുസ്തകങ്ങള്‍ പൊടിതുടച്ചുവച്ചു. ഭംഗിയില്‍ അടുക്കിപ്പെറുക്കിവച്ചു. സ്നേഹമുള്ള അദ്ധ്യാപകര്‍ അവന് വായിക്കുവാന്‍ പുസ്തകങ്ങള്‍ പറഞ്ഞുകൊടുത്തു. വെള്ളനാട് പുരമ്പിന്‍ കോണത്തുവീട്ടില്‍ പൊന്നന്റെയും തങ്കമ്മയുടെയും മകന്‍ നാരായണന് പുസ്തകജാലകങ്ങളിലൂടെ അറിവിന്റെ സൂര്യതേജസ്സ് മനസ്സില്‍ നിറഞ്ഞു. ഭാരതീയപുരാണങ്ങളിലൂടെയും, ലോകചരിത്രത്തിലൂടെയും ലോകക്ലാസ്സിക്കുകളിലൂടെയുമുള്ള യാത്രയായിരുന്നു നാരായണന് പിന്നീടിങ്ങോട്ട്.

മനസ്സില്‍ നിറഞ്ഞ അറിവ് ഭാവനയുടെ നിറക്കൂട്ടുകളില്‍ ചാലിച്ചു ചേര്‍ത്താണ് നാരായണന്‍ തന്റെ എഴുത്തുകള്‍ ആരംഭിക്കുന്നത്. എന്നാല്‍ എഴുത്തിലൂടെയല്ല നാരായണന്‍ കലാരംഗത്ത് എത്തുന്നത്. വെള്ളനാട് ഭഗവതിക്ഷേത്രത്തിലെ ഉത്സവത്തിന് വിഖ്യാത നാടകകാരന്‍ ഓച്ചിറവേലുക്കുട്ടിയുടെ സുഹൃത്തായ ബാലന്‍ മാസ്റ്ററുടെ ‘ജേതാക്കള്‍ ‘ എന്ന നാടകത്തില്‍ ഒരു വേഷമിട്ട് അന്ന് ഒന്‍പതുവയസ്സുകാരനായ നാരായണന്‍ കലാദേവതയ്ക്ക് ദക്ഷിണയര്‍പ്പിച്ച് ശിഷ്യപ്പെട്ടു. 1952 ല്‍ ആണത്. ജനങ്ങള്‍ നോട്ടുമാലയിട്ട് കൊച്ചുകലാകാരനെ ആദരിച്ചു. ‘നാടകത്തിന് ഉച്ചഭാഷിണി ഉണ്ടായിരിക്കും’ എന്ന് നോട്ടീസില്‍ പ്രത്യേകം അച്ചടിക്കുന്ന ആ കാലത്തെപ്പറ്റി നാരായണന്‍ ഓര്‍ക്കുന്നത് വളരെ വികാരഭരിതനായാണ്.

സ്കൂള്‍ പഠനത്തിനു ശേഷം തിരുവനന്തപുരം എം ജി കോളേജില്‍ നിന്ന് സുവോളജിയില്‍ ബിരുദം നേടി. തുടര്‍ന്ന് വാട്ടര്‍ അതോറിറ്റി ജീവനക്കാരനായി ജോലി നോക്കി. കലയുമായുള്ള ബന്ധം അമച്വര്‍ നാടകരംഗത്തു തുടര്‍ന്നു. ‘ജ്വാലാമുഖം’ എന്ന ഏകാങ്കമാണ് ആദ്യമെഴുതിയ നാടകം. ആദ്യമായി എഴുതിയ രണ്ടരമണിക്കൂര്‍ നാടകം വര്‍ഷമേഘങ്ങള്‍ ആണ്. എഴുതിയ നാടകങ്ങളെല്ലാം തന്നെ ഉജ്വല വിജയവും നിരവധി അവാര്‍ഡുകളും നേടി. ‘അര്‍ഥാന്തരം‘, ‘ആദിത്യഹൃദയം‘ എന്നിവയും നാരായണന് ഇഷ്ടപ്പെട്ട നാടകങ്ങള്‍ തന്നെ. ‘അര്‍ഥാന്തരം‘ നാടകം കണ്ടിട്ട് നാടകാചാര്യന്‍ എന്‍ എന്‍ പിള്ള അഭിനന്ദിച്ച കാര്യം നാരായണന്‍ അഭിമാനത്തോടെയാണ് ഓര്‍ക്കുന്നത്.
തമിഴരുടെ ‘കീമായണ’ ത്തിലെ കഥയെ ആസ്പദമാക്കി രചിച്ച നാടകമാണ് ‘ശൂര്‍പ്പണഖാ ശപഥം‘.
നിരവധി ബാലേകളും നാരായണന്‍ രചിച്ചിട്ടുണ്ട്. ബാലെ എഴുതുന്നതിനെക്കാള്‍ നാടകമെഴുതുന്നതാണ് അദ്ദേഹത്തിന് താല്പര്യമായിരുന്നത്. ബാലേകളില്‍ കവിതയ്ക്കും സംഗീതത്തിനും പ്രാമുഖ്യമുണ്ടായിരുന്നെങ്കില്‍ നാടകത്തില്‍ നാരായണന് ഏറെ ഇഷ്ടമായിരുന്ന സംഭാഷണങ്ങളായിരുന്നു മുന്‍‌പന്തിയില്‍ . കേരളത്തിലങ്ങോളമിങ്ങോളമുള്ള എല്ലാ പ്രമുഖനാടകകാരന്മാരുമായും സഹകരിച്ചു പ്രവര്‍ത്തിക്കുവാനുള്ള ഭാഗ്യം തനിക്കു ലഭിച്ചു എന്ന് അദ്ദേഹം വിനയപൂര്‍വം പറയുന്നു.

നാടകത്തില്‍ നിന്നും ബാലെയില്‍ നിന്നും എങ്ങനെയാണ് നാരായണന്‍ സിനിമയില്‍ എത്തിയത്?
സുഹൃത്തായ കല്ലയം കൃഷ്ണദാസ് മുഖേനയാണ് നാരായണന്‍ ‘അവളെന്റെ സ്വപ്നം’ എന്ന് പേരിട്ട ചിത്രത്തിന് തിരക്കഥയെഴുതാനായി സിനിമയിലെത്തുന്നത്. ആ സിനിമ പക്ഷേ റിലീസ് ആയില്ല.
തുടര്‍ന്ന് ‘സരസ്വതീയാമം’ എന്ന ചിത്രത്തിന് ഗാനങ്ങള്‍ എഴുതി. നിന്നെ പുണരാന്‍ നീട്ടിയ കൈകളില്‍ എന്ന ഗാനം ഹിറ്റായി. എങ്കിലും അദ്ദേഹത്തിന് ഇഷ്ടമായ ഗാനം സരസ്വതീയാമത്തിലെ തന്നെ ‘ശ്രീരഞ്ജിനി സ്വരരാഗിണീ’ എന്ന ഗാനമാണ്. അന്ന് ഈ ഗാനങ്ങളൊക്കെ പലരും പാടി നടന്നെങ്കിലും ഇന്നവയെല്ലാം മറവിയില്‍ വീണടിഞ്ഞുപോയിരിക്കുന്നു എന്ന് അദ്ദേഹം ദുഃഖത്തോടെ ഓര്‍ക്കുന്നു..ഓരോ പൂവിലും എന്ന ചിത്രത്തിലെ ‘പൂവേ പൊലി പാടാന്‍ വരും പൂവാലിക്കിളിയേ‘ എന്ന ഗാനം പിറവിയെടുത്തതും സംഭാഷണങ്ങളില്‍ അദ്ദേഹം ഓര്‍മ്മിച്ചെടുത്തു

‘പൌരുഷം‘ എന്ന ചിത്രവും ഗാനങ്ങളുമാണ് നാരായണന് കുറച്ചുകൂടി പേരു നേടിക്കൊടുത്തത്.
പ്രശസ്തഗാനരചയിതാവ് പാപ്പനം കോട് ലക്ഷ്മണനും നാരായണനും അടുത്ത സുഹൃത്തുക്കളായിരുന്നു. സംവിധായകന്‍ ശശികുമാര്‍ ഒരു മള്‍ട്ടിസ്റ്റാര്‍ ചിത്രം ചെയ്യുവാനായി കഥയ്ക്കുവേണ്ടി അന്വേഷിക്കുന്നു. ലക്ഷ്മണന്‍ ശശികുമാറിനോട് നാരായണന്റെ പേര് നിര്‍ദ്ദേശിക്കുന്നു. അര്‍ഥാന്തരം എന്ന നാടകം കണ്ടിട്ടുണ്ടായിരുന്ന ശശികുമാര്‍ വേറൊന്നാലോചിച്ചില്ല. നാരായണന്‍ എത്തുന്നു. സെറ്റിലിരുന്നാണ് പൌരുഷത്തിന്റെ കഥ എഴുതുന്നത്. എഴുതിയത് എഴുതിയത് ഷൂട്ട് ചെയ്തു. പ്രശസ്തമായ സുദര്‍ശന്‍ ചിറ്റ് ഫണ്ട്സ് പൊളിഞ്ഞ കഥയാണ് പൌരുഷത്തിന് ആധാരം. തമ്പി കണ്ണന്താനമായിരുന്നു അന്ന് സഹസംവിധായകന്‍ . ‘ഇനിയും ഇതള്‍ ചൂടി വിരിയും’ എന്ന ഗാനത്തിന്റെ പിറവിയും വളരെ കൌതുകകരമായി അദ്ദേഹം പറഞ്ഞുതന്നു.

ഇറങ്ങിയ പടങ്ങളെക്കാള്‍ ഇറങ്ങാത്ത പടങ്ങളാണ് തന്റേതായി ഉള്ളതെന്ന് നാരായണന്‍ . ഇരുപത്ത് എട്ടോളം ചിത്രങ്ങള്‍ക്ക് തിരക്കഥയെഴുതി. തിരക്കഥയെഴുതുവാനുള്ള വേഗത സിനിമാരംഗത്തെ പലരെയും അല്‍ഭുതപ്പെടുത്തി. എങ്കിലും വെള്ളനാട് നാരായണന്‍ എന്ന പ്രതിഭ മലയാളസിനിമയില്‍ കുപ്പയിലെ മാണിക്യം പോലെ പ്രഭ ചൊരിയാനാവാതെ മറഞ്ഞുപോയി.

‘പൌരുഷം‘ ഹിറ്റായപ്പോള്‍ സിനിമയില്‍ തന്നെ നില്‍ക്കാന്‍ ശശികുമാര്‍ ഒരുപാട് നിര്‍ബന്ധിച്ചു. പക്ഷേ സിനിമ ഒരു സ്ഥിരം വരുമാനം നല്‍കുമോ എന്ന ഭയം തീര്‍ച്ചയായും ഉണ്ടായിരുന്നു. ഒന്നാമത്തെ കാരണം അങ്ങോട്ടു പോയി അവസരങ്ങള്‍ ചോദിക്കാനും, കിട്ടുന്ന അവസരങ്ങള്‍ മുതലാക്കാനുമുള്ള മടി. നാടകത്തോടുള്ള പ്രണയമായിരുന്നു മറ്റൊരു കാരണം. ഒരു എഴുത്തുകാരന്റെ പ്രതിഭ നാടകത്തിലാണ് കൂടുതല്‍ പ്രതിഫലിക്കുക എന്ന തിരിച്ചറിവ്.
മറ്റൊരു പ്രധാനകാരണം സര്‍ക്കാര്‍ ജോലി. വരുമാനം തുഛമാണെങ്കിലും അതുകൊണ്ട് കുടുംബത്തിന്റെ കാര്യങ്ങള്‍ എല്ലാം നടന്നിരുന്നു. അതുകൊണ്ടുതന്നെ സിനിമ ഒരിക്കലും മതിഭ്രമം വരുത്തിയില്ല.

നാടകരംഗത്ത് വളരെ സജീവമായിത്തന്നെ നിലകൊണ്ടു നാരായണന്‍ . കര്‍ണ്ണന്‍ , തിരുവനന്തപുരം നവോദയാ തീയറ്റേഴ്സിന്റെ ‘കൃഷ്ണായനം’ എന്നിവ അഭൂതപൂര്‍വമായ വിജയങ്ങളായിരുന്നു. ചിലപ്പതികാരം നാടകമാക്കിയപ്പോള്‍ ചിലപ്പതികാരത്തിന്റെ മലയാള പരിഭാഷകനും, മധുരാ സര്‍വകലാശാല ഡീനുമായിരുന്ന നെന്മാറ പരമേശ്വരന്‍ നായര്‍ നാരായണന്റെ ടെലഫോണ്‍ നമ്പര്‍ തിരഞ്ഞു പിടിച്ച് വിളിച്ച് അഭിനന്ദിക്കുകയുണ്ടായി.

ഏഷ്യാനെറ്റ് സീരിയലുകളില്‍ മുന്‍ നിരയില്‍ നില്‍ക്കുന്ന ‘ദേവീ മാഹാത്മ്യ‘ത്തിന്റെ തിരക്കഥ എഴുതിത്തുടങ്ങിയത് നാരായണനാണ്. പക്ഷേ അവിചാരിതമായി എത്തിയ ആരോഗ്യപ്രശ്നങ്ങള്‍ അദ്ദേഹത്തെ അതില്‍ നിന്നും വിലക്കിനിര്‍ത്തി. ഒരിടവേളയ്ക്കും വിശ്രമത്തിനും ശേഷം പൂര്‍വാധികം ശക്തിയോടെ സീരിയല്‍ തിരക്കഥാരംഗത്തേക്കു തിരിച്ചുവരാനാണ് അദ്ദേഹത്തിന്റെ തീരുമാനം.
ജീവിതത്തില്‍ ആഗ്രഹങ്ങള്‍ തീരെ ഇല്ലാത്ത ഒരാളാണ് താനെന്ന് നാരായണന്‍ വിനയപൂര്‍വം പറയുന്നു. ഇന്നത്തെ കണക്കില്‍ ‘എന്തുനേടി?’ എന്നു ചോദിച്ചാല്‍ ഒന്നും നേടിയില്ല എന്നു പറയുന്ന ഗണത്തില്‍ പെടുന്നയാള്‍ . ബുദ്ധദേവന്റെ തത്വമായ ‘ആശയാണ് എല്ലാ ദുഃഖങ്ങള്‍ക്കും കാരണം’ എന്ന വാക്യത്തില്‍ ഉറച്ചു വിശ്വസിക്കുന്നു.

ഞങ്ങള്‍ പോയിക്കണ്ട വീടും പരിസരവും ആ ബുദ്ധതത്വത്തെ ഓര്‍മ്മിപ്പിക്കുന്നു. നിറക്കൂട്ടുകളിലും ജാഡകളിലും അഭിരമിക്കുന്ന സിനിമാ തലമുറകള്‍ക്കൊരപവാദമായി വസന്തം എന്ന് പേരിട്ട നാരായണന്റെ കൊച്ചു വീട്. ഭാര്യ. മൂന്നു മക്കള്‍ , അച്ഛന്‍ വളര്‍ത്തി വലുതാക്കിയ മക്കളെല്ലാം ഇന്ന് സാമാന്യം നല്ലനിലയില്‍ ജീവിക്കുന്നു. അവിചാരിതമായി പടികടന്നു വന്നതാണ് ശ്വാസകോശത്തിലെ അര്‍ബുദബാധ. തുടക്കത്തിലേ കണ്ടുപിടിച്ചതുകൊണ്ട് ഇപ്പോള്‍ കീമോ തെറാപ്പിക്കു ശേഷം അദ്ദേഹം വിശ്രമിക്കുന്നു.

1998 ല്‍ നാടകരംഗത്തെ സമഗ്രസംഭാവനയ്ക്കുള്ള ഗുരുപൂജ പുരസ്കാരം കേരള സംഗീതനാടക അക്കാദമി അദ്ദേഹത്തിന് നല്‍കിയിട്ടുണ്ട്. കേരള ഗവണ്മെന്റ് ചികിത്സയ്ക്കായി 25000 രൂപ നല്‍കാമെന്ന് ഏറ്റിട്ടുണ്ടെങ്കിലും ഇതുവരെ ലഭിച്ചിട്ടില്ല.

കൂത്താടുന്ന കുറകുടങ്ങള്‍ കേള്‍പ്പിക്കുന്ന ശബ്ദകോലാഹലത്തിനിടയില്‍ ഒരു മന്ദഹാസത്തോടെ അതെല്ലാം നോക്കിക്കാണുന്ന ഒരു നിറകുടമാണ് വെള്ളനാട് നാരായണന്‍ എന്ന എഴുത്തുകാരന്‍ . കപടജ്ഞാനികള്‍ക്ക് ഓശാനപാടിപ്പാടി യഥാര്‍ഥജ്ഞാനവും വ്യക്തിത്വവും എന്തെന്നു തിരിച്ചറിയാന്‍ പോലും പറ്റാത്ത ഒരു ശപിക്കപ്പെട്ട തലമുറയായി നാം മാറിയിരിക്കുന്നു. അല്‍ഭുതംകൂറുന്ന മിഴികളുമായിമാത്രമേ വെള്ളനാട് നാരായണന്‍ എന്ന വ്യക്തിയോട് നമുക്ക് സംസാരിക്കുവാനാകൂ. വായന നല്‍കിയ സമുദ്രോപമമായ അറിവ്. അത് പുറത്തു കാണാനാവാത്ത പ്രശാന്തത, നിര്‍മ്മലത. ഒരു സൈക്കിള്‍ പോലുമില്ലാതെ, വഴിയരികിലൂടെ ഈ മനുഷ്യന്‍ നടന്നുപോകുമ്പോള്‍ എ സി കാറുകളില്‍ കൂളിംഗ് ഗ്ലാസും വച്ച് ചീറിപ്പാഞ്ഞുപോകുന്ന അഭിനവ കലാകാരന്മാരേ നിങ്ങള്‍ ലജ്ജിച്ചു തലതാഴ്ത്തിയേ മതിയാവൂ.

മലയാള സിനിമയില്‍ ഒരു പിടി ഗാനങ്ങളും, റിലീസാവാന്‍ ഭാഗ്യം കിട്ടാത്ത ഒരുപിടി സിനിമകള്‍ക്ക് തിരക്കഥയുമെഴുതിയ ഒരാളെ തേടിപ്പോയ ഞങ്ങള്‍ തിരിച്ചിറങ്ങിയത് ഒരു ബഹുമുഖപ്രതിഭയെ കണ്ടുമുട്ടിയ ആഹ്ലാദത്തിലാണ്.

(മലയാളസംഗീതം.ഇന്‍ഫോയ്ക്ക് വേണ്ടി ശ്രീമതി സ്നേഹ തോമസ് വെള്ളനാട് സാരായണനും ആയി നേരിട്ട് നടത്തിയ അഭിമുഖത്തില്‍ നിന്ന് ... )

എന്റെ അവാര്‍ഡ്‌ കീറിപ്പോയി

2011-05-04T08:29:00.000-07:00

mani_enna_balanadan എന്റെ അവാര്‍ഡ്‌ കീറിപ്പോയി

സില്‍ക് സ്മിതയായി വിദ്യാ ബാലന്‍

2011-05-04T06:56:00.000-07:00

VidyaBalan

ഓര്‍ത്തു പാടുന്നു ഞാന്‍

2011-05-04T06:37:00.002-07:00

MJayachandran

നിറക്കൂട്ടുകളിൽനിന്ന് ഒരാൾ നാടകത്തിലേക്ക് കയറിവരുന്നു....

2011-05-04T03:04:00.001-07:00

Vasu Pradeep

ഉഷസ്സ് വിളിച്ചാലും ഉണരാതെ

2011-04-30T20:39:00.001-07:00

a.p.gopalan

ധന്യസ്മൃതി - എം എസ് നമ്പൂതിരി ജന്മശതാബ്ദി സ്മരണിക

2011-04-21T08:57:00.000-07:00

Dhanyasmrithi - MS Namboothiri Janmashathaabdi Smaranika

നേരോടെ തിലകന്‍

2011-04-21T07:44:00.002-07:00

thilakan

എന്റെ വിഷുക്കണി ...മോണിഷയെ അമ്മ ഓര്‍ക്കുന്നു

2011-04-14T08:09:00.000-07:00

monisha - amma

Njanikalude Sammanam

2011-04-13T06:06:00.001-07:00

2.njanikalude sammanam

ഉണ്ണിയാര്‍ച്ച യിലെ പാട്ടുകള്‍

2011-04-09T22:43:00.005-07:00

പത്തു വര്‍ഷങ്ങളുടെ അകലത്തില്‍ ഇറങ്ങിയ ഉദയായുടെ രണ്ടു് പടങ്ങള്‍ .

1. ഉണ്ണിയാര്‍ച്ച . 1961 . ഈ സിനിമയുടെ സംഗീത സംവിധാനം കെ രാഘവന്‍ മാസ്റ്റര്‍

2. ആരോമലുണ്ണി . 1972 . ഈ സിനിമയുടെ സംഗീത സംവിധാനം ദേവരാജന്‍ മാസ്റ്റര്‍

രണ്ടു് വീഡിയോയിലും ഒരേ പാട്ടു് - ഒരേ ട്യൂണ്‍ - ഒരേ വരികള്‍ - "പാടാം പാടാം ആരോമല്‍ ചേകവര്‍ പണ്ടങ്കം വെട്ടിയ കഥകള്‍ "

പ്രശ്നം - ഉണ്ണിയാര്‍ച്ചയുടെ വീഡിയോയില്‍ -

a) വീഡിയോവില്‍ ഈ പാട്ടു് ഉണ്ടു്. ആരോമലുണ്ണിയിലെ അതേ പാട്ടു്, അനുപല്ലവിയിലെ വരികള്‍ ഒഴിവാക്കി, പാട്ടിന്റെ അവസാനത്തെ രണ്ടു വരികള്‍ മുറിച്ചു രണ്ടാക്കി രണ്ടു് വെത്യസ്ത സീനുകളിലാക്കി.

b) അതേ ഗായകര്‍ .

c) ഉണ്ണിയാര്‍ച്ചയുടെ ടൈട്ടില്‍സു് നോക്കു.

പാടിയവര്‍ - പി ലീല, പി സുശീല, ജാനകി, എ എം രാജ, പി ബി ശ്രീനിവാസു്, മെഹബൂബു്.

യേശുദാസിന്റെയും ജയചന്ദ്രന്റെയും പേരില്ല!!

d) യേശുദാസു് സിനിമയ്ക്കു് പാടാന്‍ തുടങ്ങിയതു് 1962 ല്‍. ജയചന്ദ്രന്‍ സിനിമയ്ക്കു് പാടാന്‍ തുടങ്ങിയതു് 1966 ല്‍. ഉണ്ണിയാര്‍ച്ച ഇറങ്ങിയതു് 1961 ല്‍ !!

e) "ഉടവാളേ പടവാളേ" എന്ന പാട്ടും "പോരിങ്കല്‍ ജയമല്ലോ" എന്ന പാട്ടും ഉണ്ണിയാര്‍ച്ചയുടെ സിഡിയില്‍ കാണുന്നില്ല!

അപ്പോള്‍ നാം കാണുന്ന ഉണ്ണിയാര്‍ച്ച സിനിമയുടെ വീഡിയോയില്‍ കേള്‍ക്കുന്ന പാട്ടു് ഏതാണു്? രാഘവന്‍ മാസ്റ്റര്‍ സംഗീത സംവിധാനം ചെയ്തു, പി ബി ശ്രീനിവാസന്‍ പാടിയ പാട്ടു് ഈ വീഡിയോവില്‍ നിന്നു് എങ്ങിനെ പോയി? പത്തു വര്‍ഷത്തിനു ശേഷം ഇറങ്ങിയ ആരോമലുണ്ണി എന്ന പടത്തിലെ പാട്ടു് എങ്ങിനെ ഉണ്ണിയാര്‍ച്ച സിനിമയുടെ വീഡിയോവില്‍ വന്നു?

ഉത്തരം: 1961 ലെ ഉണ്ണിയാര്‍ച്ച 1983 ല്‍ പുതിയ പ്രിന്റ് എടുത്തു് വീണ്ടും റിലീസായപ്പോള്‍ വന്ന മാറ്റങ്ങള്‍ ആണിതു്. രണ്ടാമതു് റിലീസായതിന്റെ സെന്‍സര്‍ സര്‍ട്ടിഫിക്കറ്റാണിതിനു തെളിവായിട്ടുള്ളതു്. ഈ പ്രിന്റു് ആണു് സിഡി ആയി ഇപ്പോള്‍ മാര്‍ക്കറ്റില്‍ എത്തിയതു്.

എന്തു് കൊണ്ടു് പാട്ടുകള്‍ക്കു് മാറ്റം വന്നതു്? ഉദയായുടെ ഉണ്ണിയാര്‍ച്ചയുടെ ക്യാമറാമാന്‍ ശ്രീ റ്റി എന്‍ കൃഷ്ണന്‍കുട്ടി നായരോടു് തന്നെ ചോദിക്കുക തന്നെ.

ഇവിടെ

അദ്ദേഹം പറയുന്നു. "പണ്ടു് പടം പിടിക്കുമ്പോള്‍ പിക്ചര്‍ ഒരു ഫിലിമിലും ഓഡിയോ വേറേ ഫിലിമിലും ആയിട്ടാണു് നെഗറ്റീവു് തയ്യാറാക്കുന്നതു്. നെഗറ്റീവില്‍ നിന്നും പ്രിന്റു് എടുക്കുന്ന അവസരത്തിലാണു് രണ്ടും കൂടി ചേര്‍ത്തെടുക്കുന്നതു്. അന്നൊന്നും ഇന്നത്തെ പോലെ ഫിലിം സൂക്ഷിക്കാനുള്ള സംവിധാനങ്ങള്‍ ഉണ്ടായിരുന്നില്ല. അതുകൊണ്ടു് ചില ഭാഗങ്ങളില്‍ വീഡിയോയും മറ്റു ചില ഭാഗങ്ങളില്‍ ഓഡിയോയും നഷ്ടപ്പെട്ടിരിക്കാം. രാഘവന്‍ മാസ്റ്റര്‍ സംവിധാനം ചെയ്തു് പി ബി ശ്രീനിവാസന്‍ പാടിയ ഗാനത്തിന്റെ ഓഡിയോ മാത്രമായി നഷ്ടപ്പെട്ട ഭാഗങ്ങളിലെ വീഡിയോ നില നിര്‍ത്താന്‍ വേണ്ടി ആ ഭാഗത്തു് ആരോമലുണ്ണിയ്ക്കു വേണ്ടി ദേവരാജന്‍ മാസ്റ്റര്‍ സംവിധാനം ചെയ്തു് യേശുദാസും ജയചന്ദ്രനും പാടിയ പാട്ടു് ചേര്‍ത്തതാവാം. "

"പടത്തിന്റെ അവസാന ഭാഗത്തു് ചന്തുവുമായുള്ള കുട്ടികളുടെ യുദ്ധം വരുന്ന ഭാഗം വീഡിയോ സീഡിയിലില്ല. ആ ഭാഗം വീഡിയോ നഷ്ടപ്പെട്ടു പോയിരിക്കാം. ചന്തുവിന്റെ തല വെട്ടുന്ന ഭാഗം വീഡിയോ കേടില്ലാതിരുന്ന ഭാഗത്തു് ആരോമലുണ്ണിയിലെ പാട്ടിന്റെ അവസാന വരികള്‍ ചേര്‍ത്തതും പടം നഷ്ടപ്പെടാതിരിക്കാനായിരുന്നിരിക്കണം"

അവശേഷിക്കുന്ന ചോദ്യങ്ങള്‍

1. ആദ്യം രാഘവന്‍ മാസ്റ്റര്‍ ഈ സീനിനു വേണ്ടി സംവിധാനം ചെയ്ത പാട്ടു് ഏതാണു്? ആ പാട്ടു് എവിടെയെങ്കിലും ഉണ്ടോ? വീഡിയോയുടെ ഒപ്പമോ അല്ലാതേയോ?

2. "ഉടവാളേ പടവാളേ", "ജയഭേരി ജയഭേരി", "പോരിങ്കല്‍ ജയമല്ലോ" എന്നീ പാട്ടുകളുടെ ഉണ്ണിയാര്‍ച്ച 1961 സിനിമയിലെ സന്ദര്‍ഭം ഏതാണു്?

ഉത്തരങ്ങള്‍ ലഭിക്കാനുള്ള ശ്രമങ്ങളിലാണ്.......

മാധവഭദ്രന്‍

മലയാളസംഗീതത്തിന് സമര്‍പ്പിക്കപ്പെട്ട ആല്‍ബം

2011-04-08T21:02:00.003-07:00

മലയാളസംഗീതത്തിന് അഭിമാനനിമിഷം!!! അജയ്‌അജിത് മ്യൂസിക്‍സ് അവരുടെ ഏറ്റവും പുതിയ ആല്‍ബം ‘സ്നേഹമെന്‍ ഹൃദയത്തില്‍ ‘ എം എസ് ഐയ്ക്കായി സമര്‍പ്പിച്ചിരിക്കുന്നു.

അജയ്‌അജിത് മ്യൂസിക്‍സിനോടും, രചയിതാവ് രാജന്‍ കിണറ്റിന്‍കരയോടും, സംഗീതസംവിധായകന്‍ RAVE J MENON നോടും, ശ്രീ പി സത്യനോടും, ‘സ്നേഹമെന്‍ ഹൃദയത്തില്‍ ‘ എന്ന ആല്‍ബത്തിന് പിന്നണിയില്‍ പ്രവര്‍ത്തിച്ച ഓരോ വ്യക്തിയോടുമുള്ള എം എസ് ഐയുടെ നിസ്സീമമായ നന്ദിയും കടപ്പാടും അറിയിക്കുകയാണ്.
ആറുപാട്ടുകളുള്ള സ്നേഹമെന്‍ ഹൃദയത്തില്‍ എന്ന ആല്‍ബത്തില്‍ മധു ബാലകൃഷ്ണന്‍ , പ്രദീപ് പള്ളുരുത്തി. അജയ് സത്യന്‍ , രജനി രവി. പ്രീത പി വി, രാധിക വേണുഗോപാല്‍ എന്നിവര്‍ പാടിയിരിക്കുന്നു. ഭദ്രദാസ് പട്ടാഴി എഴുതിയ രണ്ടു ഗാനങ്ങളും ഇതിലുണ്ട്.

Kazhuthayude Kathasaram

2011-04-08T12:11:00.002-07:00

KAZHUTHAYUDE KATHASARAM

ഗായക പീതാംബരം

2011-04-08T06:02:00.002-07:00

അവസാനകാലത്തെ ചിത്രം
(MRP During his last days)

എം ആര്‍ പീതാംബരമേനോന്‍ (1990) ഗുരുവായൂര്‍ ചമ്പൈ സംഗീതോത്സവത്തില്‍ പാടുന്നു.
(MRP singing at Guruvayur Chembai Music Festival)

മങ്കൊമ്പ് ഗോപാലകൃഷ്ണന്‍

2011-04-05T23:47:00.005-07:00

ഓര്‍മകളുടെ ലക്ഷാര്‍ച്ചന......... കടപ്പാട് മെട്രോ വാര്‍ത്ത

അനൂപ് മോഹന്‍

എറണാകുളത്ത് വൈറ്റില യ്ക്കു സമീപം ലക്ഷാര്‍ച്ചന യെന്ന വീട്ടിലേക്കു നടക്കുമ്പോള്‍ മനസിലൊരു സിനിമാപ്പാട്ടായിരുന്നു. ലക്ഷാര്‍ച്ചന കണ്ടു മടങ്ങുമ്പോഴൊരു ലജ്ജയില്‍ മുങ്ങി യ മുഖം കണ്ടു... വീട്ടുപേരാല്‍ ചുണ്ടില്‍ കിളിര്‍ത്ത അനുപല്ലവിയായിരുന്നില്ല. ലക്ഷാര്‍ച്ചനയെന്ന വീടിന്‍റെ ഗൃഹനാഥനെഴുതിയ ഈ വരികളിലൂടെയാണു വര്‍ഷങ്ങള്‍ക്കു മുന്‍പ് പ്രേംനസീര്‍ ലജ്ജയില്‍ മുങ്ങിയ മുഖം കണ്ടത്, മല്ലികാര്‍ജുന ക്ഷേത്രത്തില്‍ വച്ചവള്‍ മല്ലീശ്വരന്‍റെ പൂവമ്പുകൊണ്ടു എന്നു പാടിയത്. ഒരു പക്ഷേ, മലയാള സിനിമയുടെ സ്ഥിരം ആഘോഷവേദികളിലോ, അഭിമുഖപരമ്പരകളിലെ പതിവു മുഖമായോ ഈ പാട്ടെഴുത്തുകാര നെ, തിരക്കഥാകൃത്തിനെ, സാഹിത്യകാരനെ കാണാന്‍ കഴിയില്ല. ആ നല്ല ഗാനത്തിന്‍റെ മധുരമറിഞ്ഞവര്‍ പോലും ആ മുഖം കണ്ടിട്ടുമുണ്ടാകില്ല. ഒരു മൂളിപ്പാട്ടായി ചുണ്ടി ലെത്തുന്ന ഗാനങ്ങള്‍ ഈ മനുഷ്യന്‍ എഴുതിയതാണെന്നു പലരും തിരിച്ചറിഞ്ഞിട്ടുണ്ടാകില്ല. എത്രയോ വര്‍ഷങ്ങളായി സജീവസിനിമയുടെ ടൈറ്റില്‍ കാര്‍ഡില്‍, ഗാനരചയിതാവായും തിരക്കഥാകൃത്തായും, മങ്ങാതെ ആ പേരു തെളിഞ്ഞുകൊണ്ടേയിരിക്കുന്നു... മങ്കൊമ്പ് ഗോപാലകൃഷ്ണന്‍ .

കാര്‍ഷിക സമൃദ്ധിയുടെ മണമു ള്ള മങ്കൊമ്പിന്‍റെ മണ്ണില്‍ നിന്നു മദ്രാസിന്‍റെ സിനിമാഭൂമിയില്‍. വേഷങ്ങള്‍ പലതായിരുന്നു. പത്രാധിപര്‍, ഗാനരചയിതാവ്, തിരക്കഥാകൃത്ത്. ചിരഞ്ജീവിയും നാഗാര്‍ജുനയുമൊക്കെ മലയാളം പറഞ്ഞ തും മങ്കൊമ്പ് എഴുതിയ സംഭാഷണങ്ങളിലൂടെയാണ്. ആഘോഷങ്ങളോ അറിയിക്കലുകളോ ഇല്ലാ തെ സ്നേഹിച്ച മാധ്യമത്തില്‍ ഇന്നും ഉറച്ചു നില്‍ക്കുന്നു, മങ്കൊമ്പ് ഗോപാലകൃഷ്ണന്‍. ലക്ഷാര്‍ച്ചനയിലിരുന്ന് ഓര്‍മ കള്‍ പങ്കുവയ്ക്കുമ്പോള്‍, ഞാനാണ് എല്ലാം എന്നു തെളിയിക്കുന്നവിധത്തില്‍, ഓര്‍മകളുടെ ഒരു ക്യാപ്സ്യൂള്‍ അദ്ദേഹം കരുതിവച്ചിരുന്നില്ല. സ്മരണകളില്‍ നിന്നു സ്മരണകളിലേക്കു കണക്റ്റ് ചെയ്യു ന്ന ജീവിതാനുഭവങ്ങള്‍...

കുട്ടനാടിന്‍റെ പച്ചപ്പു നിറയുന്ന അന്തരീക്ഷത്തില്‍ സാഹിത്യതാല്‍പ്പര്യമുള്ള ഒരു പയ്യന്‍. ഗോവിന്ദന്‍ നായരുടെയും ദേവകിയമ്മയുടെ യും മകന്‍. നാട്ടിലെ സികെപി സ്മാരക ഗ്രന്ഥശാലയുടെ സെക്രട്ടറിയായിരുന്നു അച്ഛന്‍. പുസ്തകങ്ങള്‍ ലൈബ്രറിയില്‍ എത്തുന്നതി നു മുന്‍പ് സെക്ഷന്‍ തിരിക്കുന്നതിനായി ഗോപാലകൃഷ്ണന്‍റെ വീട്ടിലെത്തും. വായനയുടെ സുഖമറി ഞ്ഞ നാളുകള്‍. ഉച്ചവരെ സ്കൂള്‍ കഴിഞ്ഞാല്‍ തിരികെ വീട്ടിലെത്തുമ്പോള്‍, പുസ്തകങ്ങളായിരിക്കും വിരുന്നൊരുക്കിയിട്ടുണ്ടാകുക. രണ്ടാം ക്ലാസില്‍ പഠിക്കുമ്പോള്‍ അമ്മ മരിച്ച മകന് അക്ഷരങ്ങളുടെ താരാട്ട്.

സാഹിത്യത്തിന്‍റെ സുഗന്ധമനുഭവിച്ച ഏതൊരാളെയും പോലെ ആദ്യ എഴുത്തിന്‍റെ ശ്രമങ്ങള്‍ കവിതകളിലൂടെയായിരുന്നു. തിരുത്തിക്കൊടുക്കാന്‍ അധ്യാപകരും. ഒരിക്കല്‍ സ്കൂളിലേക്കൊരു മണി ഓര്‍ഡര്‍. ഗ്രന്ഥലോകം മാഗസിനില്‍ എഴുതിയ നിരൂപണത്തിനുള്ള പ്രതിഫലം. ഏഴു രൂപയുടെ മണി ഓര്‍ഡര്‍ ഒപ്പിട്ടു വാങ്ങുമ്പോള്‍, ഒന്‍പതാം ക്ലാസുകാരന്‍ ഗോപാലകൃഷ്ണന്‍ ഓര്‍ത്തിരുന്നു പോലുമില്ല, പിന്നീട് ഇതേ മാഗസിന്‍റെ പത്രാധിപരുടെ കസേര, കാലം കരുതിവച്ചിട്ടുണ്ടെന്ന്. ഇതിനിടെ സിനിമാപ്പാട്ടുകളും ആകര്‍ഷിച്ചു തുടങ്ങി. തിയെറ്ററിന്‍റെ ഇരുട്ടിലിരുന്ന്, ഭാര്യ എന്ന സിനിമ കണ്ടു തിരികെയിറങ്ങുമ്പോള്‍ മനസിലും ചുണ്ടിലും, പെരിയാറേ... എന്ന ഗാനത്തിന്‍റെ സൗന്ദര്യമായിരുന്നു.

പുസ്തകങ്ങള്‍ വായിച്ചും കവിതകളെഴുതിയും കാലം കടന്നു പോയി. ഗ്രന്ഥലോകം മാഗസിനില്‍ ജോലിക്കായി തിരുവനന്തപുരത്ത്. രാവിലെ ആറു മണിക്കു തുടങ്ങുന്ന ജോലി രാത്രി വൈകും വരെ നീളും. സിനിമാസ്വപ്നങ്ങള്‍ക്കു വളമേകാന്‍ ഒട്ടും സമയമില്ലാത്ത അവസ്ഥ. ഒരു സെക്കന്‍ഡ് ഷോ പോലും കാണാന്‍ കഴിയാത്ത സാഹചര്യം. പാട്ടെഴുതണമെന്ന ആഗ്രഹം തീവ്രവും. ഒരുപാടു പ്രശസ്തരെ പരിചയപ്പെടാന്‍ കഴിഞ്ഞ കാലമായിരുന്നു തിരുവനന്തപുരത്തേതെന്നു ഗോപാലകൃഷ്ണന്‍ ഓര്‍മിക്കുന്നു. മദ്രാസിലേക്കു പോകണമെന്നുണ്ടായിരുന്നു. എന്നാല്‍ എന്തെങ്കിലുമൊരു കാര്യത്തിനല്ലാതെ പോകാന്‍ മനസനുവദിച്ചില്ല. ആയിടക്കാണ് മദ്രാസ് ലിറ്റററി കോപ്പറേറ്റിവ് സൊസൈറ്റിയുടെ, അന്വേഷണം മാഗസിനിലേക്ക് എഡിറ്ററെ അന്വേഷിക്കുന്ന വിവരം കവി അയ്യപ്പപ്പണിക്കര്‍ അറിയിക്കുന്നത്. മദ്രാസിലേക്കു പോകുന്ന വിവരം ഗ്രന്ഥശാലാ സ്ഥാപകന്‍ പി.എം പണിക്കരോടു പറഞ്ഞാല്‍ വിടില്ലെന്നറിയാമായിരുന്നു. അതുകൊണ്ടു തന്നെ മദ്രാസിലെത്തിയശേഷമാണ് ഗ്രന്ഥലോകത്തില്‍ നിന്നു രാജിവച്ചത്.

വയലാര്‍ രാമവര്‍മ്മയായിരുന്നു അന്വേഷണത്തിന്‍റെ ചീഫ് എഡിറ്റര്‍. മങ്കൊമ്പ് സിറ്റിങ് എഡിറ്ററും. അതിനുമുന്‍പേ വയലാറിനെ പരിചയമുണ്ടായിരുന്നു. വയലാറിന്‍റെ നിരീശ്വരവാദ കവിതകളെക്കുറിച്ച്, ഗോപാലകൃഷ്ണന്‍ എഴുതിയ പഠനം കൗമുദി വാരികയില്‍ പ്രസിദ്ധീകരിക്കുന്നതറിഞ്ഞ്, വയലാര്‍ ഒരു കവിതയെഴുതിക്കൊടുത്തു, ജ്വാലാവിഭ്രാന്തി. വയലാറിന്‍റെ കവിത മുന്‍പിലും, മങ്കൊമ്പിന്‍റെ പഠനം ഉള്‍പ്പേജുകളിലുമായാണ് അത്തവണത്തെ കൗമുദി പുറത്തിറങ്ങിയത്.

അന്വേഷണത്തില്‍ നിന്നു ഫിലിം നാദം, ചിത്രപൗര്‍ണമി എന്നീ മാഗസിനുകളുടെ മദ്രാസിലെ ചുമതല ഏറ്റെടുത്തു. അപ്പോഴും പാട്ടിന്‍റെ ഈരടികള്‍ മോഹമായി മനസിലുണ്ടായിരുന്നു. പാട്ടുകാരന്‍ കെ.പി ഉദയഭാനുവിന്‍റെ അനിയന്‍ ചന്ദ്രമോഹനൊപ്പമായിരുന്നു മദ്രാസില്‍ താമസം. ചന്ദ്രമോഹന്‍റെ കൂട്ടുകാരനെടുക്കുന്ന ഒരു ചിത്രത്തിലേക്ക് പാട്ടെഴുതാന്‍ അവസരം കിട്ടി. അലകള്‍ എന്ന ചിത്രത്തില്‍ ദക്ഷിണാമൂര്‍ത്തിയുടെ സംഗീതത്തില്‍ ആറു പാട്ടുകള്‍, അഷ്ടമിപ്പൂത്തിങ്കളേ....ഉള്‍പ്

പെടെയുള്ള ഇമ്പമുള്ള ഗാനങ്ങള്‍. പിന്നെയും മങ്കൊമ്പ് സിനിമാപ്പാട്ടുകളെഴുതി. വരികളില്‍ ഈണം ചേര്‍ന്നെങ്കിലും, പല സിനിമകളും അഭ്രപാളിയിലെത്തിയില്ല. ഒടുവില്‍ ബ്രെയ്ക്കാവുന്നതു ഹരിഹരന്‍ സംവിധാനം ചെയ്ത അയലത്തെ സുന്ദരി. ലക്ഷാര്‍ച്ചന കണ്ടു മടങ്ങുമ്പോള്‍... എന്ന ഗാനം എക്കാലത്തെയും ഹിറ്റ്. അന്ന് ഒരു തീരുമാനമെടുത്തു, ഇറങ്ങുമെന്നുറപ്പുള്ള ചിത്രങ്ങള്‍ക്കു മാത്രമേ ഇനി ഗാനങ്ങളെഴുതൂ എന്ന്. 1974ല്‍ മാത്രം പതിനെട്ടോളം ചിത്രങ്ങളിലാണു മങ്കൊമ്പിന്‍റെ വരികളുടെ സൗരഭ്യം നിറഞ്ഞത്. നിന്നിഷ്ടം എന്നിഷ്ടം എന്ന ചിത്രത്തിലെ ഇളം മഞ്ഞിന്‍ കുളിരുമായൊരു കുയില്‍...എന്ന ഗാനം സൂപ്പര്‍ഹിറ്റായി ഇന്നും നിലനില്‍ക്കുന്നു.

നിന്നിഷ്ടം എന്നിഷ്ടം എന്ന ചിത്രത്തിന്‍റെ രണ്ടാംഭാഗം ഒരുങ്ങുമ്പോഴും മങ്കൊമ്പ് കൂടെയുണ്ട്. ഇളംമഞ്ഞിന്‍, തുമ്പപ്പൂ എന്നീ ഗാനങ്ങള്‍ വീണ്ടും ഉപയോഗിക്കുമ്പോള്‍ പുതിയ രണ്ടു ഗാനങ്ങളും മങ്കൊമ്പ് എഴുതുന്നു.

അനുഭവങ്ങളില്‍ നിന്നു പഠിച്ച പാഠങ്ങളായിരുന്നു പിന്നീടു സംഗീതജീവിതത്തില്‍ പുതുമ തേടാന്‍ മങ്കൊമ്പിനെ പ്രേരിപ്പിച്ചത്. അതുവരെ പാട്ടുകളില്‍ പ്രത്യക്ഷപ്പെടാത്ത വാക്കുകള്‍. ലക്ഷാര്‍ച്ചന എന്ന ഗാനം ഉദാഹരണം. ല എന്ന അക്ഷരത്തില്‍ അപൂര്‍വം പാട്ടുകളെ തുടങ്ങിയിരുന്നുള്ളൂ. ത്രയംബകം, ആഷാഢമാസം...പുതിയ പദങ്ങളോട് അടങ്ങാത്ത അഭിനിവേശമായിരുന്നു. വരികളിലെ പരീക്ഷണം അംഗീകരിക്കപ്പെട്ടു. കാലമേറെ കഴിഞ്ഞിട്ടും മങ്കൊമ്പിന്‍റെ വരികള്‍ ഓര്‍മയില്‍ ശേഷിക്കുന്നതിന്‍റെ കാരണവും മറ്റൊന്നല്ല. കമലഹാസനും ശ്രീദേവിയും ആദ്യമായി ഒരുമിച്ച കുറ്റവും ശിക്ഷയും, റൂബി മൈ ഡാര്‍ലിങ്, ഇവള്‍ ഈ വഴി ഇതുവരെ തുടങ്ങി അഞ്ചോളം സിനിമകള്‍ക്കു തിരക്കഥയുമെഴുതി. മദ്രാസ് ജീവിതത്തിനിടയില്‍ തെലുങ്ക്, കന്നഡ ഭാഷകള്‍ പഠിക്കാനായതു പിന്നീടു കലാജീവിതത്തിന്‍റെ വഴി മറ്റൊരു റൂട്ടിലേക്കു തിരിച്ചു...

മൊഴിമാറ്റ ചിത്രങ്ങളുടെ ആചാര്യന്‍ അഭയദേവിനെ പരിചയപ്പെട്ടതായിരുന്നു വഴിത്തിരിവ്. അദ്ദേഹമെഴുതിയ പല ചിത്രങ്ങള്‍ക്കും മങ്കൊമ്പ് പാട്ടെഴുതിയിട്ടുണ്ടായിരുന്നു. ഒരിക്കല്‍ അദ്ദേഹം ചോദിച്ചു, ഗോപാലകൃഷ്ണനു ഡബ്ബിങ് ചിത്രങ്ങള്‍ക്ക് എഴുതിക്കൂടേ...? ആ ചോദ്യം പിന്നീടു മൊഴിമാറ്റ ചിത്രങ്ങളുടെ അമരക്കാരനാക്കി മാറ്റുന്നതിനു കാരണമായി. തെലുങ്കിലെ കൊണ്ടവീട് സിംഹം എന്ന ചിത്രം മലയാളത്തിലേക്ക് അഗ്നിയാണു ഞാന്‍ അഗ്നി എന്ന പേരില്‍ മൊഴിമാറ്റിയായിരുന്നു തുടക്കം. സന്ദര്‍ഭവും അര്‍ഥവും മനസിലാക്കി വേണം മൊഴിമാറ്റാനെന്നു മങ്കൊമ്പ് പറയുന്നു. അല്ലെങ്കില്‍ വെറുതെ ട്രാന്‍സ്ലേഷനേ ആകുന്നുള്ളൂ. ലിപ് മൂവ്മെന്‍റും കറക്റ്റാകണം. ഡബ്ബിങ്, സ്ട്രെയ്റ്റ് സിനിമ എന്നിങ്ങനെയുള്ള വകഭേദം ഒരിക്കലും തോന്നിയിട്ടില്ല. മൊഴിമാറ്റ ചിത്രങ്ങളിലുള്‍പ്പെടെ എണ്ണൂറോളം പാട്ടുകള്‍, ഇരുന്നൂറോളം മൊഴിമാറ്റചിത്രങ്ങള്‍. ഇന്നും സജീവമായി സിനിമാരംഗത്തുണ്ട് മങ്കൊമ്പ്. മങ്കൊമ്പെഴുതുന്ന മലയാളത്തിനായി ഒരുപാട് അന്യഭാഷചിത്രങ്ങള്‍ കാത്തുനില്‍ക്കുന്നു. ചിത്രങ്ങള്‍ക്കായി നല്ല വരികളൊരുക്കുന്നു. ചിരഞ്ജീവി മുതല്‍ പുതിയ സെന്‍സേഷന്‍ അല്ലു അര്‍ജുന്‍ വരെയുള്ള സൂപ്പര്‍ താരങ്ങള്‍ കേരളത്തില്‍ പാടുന്നതും പറയുന്നതും മങ്കൊമ്പിന്‍റെ മലയാളം.

ഒരു നിര്‍മാതാവിനു കഥ കിട്ടിയാല്‍ ആരെക്കൊണ്ടു സംവിധാനം ചെയ്യിപ്പിക്കാമെന്നു തീരുമാനിക്കുന്നു, എഴുതാന്‍ ആളെ തീരുമാനിക്കുന്നു. അഭിനേതാക്കള്‍, മറ്റ് അണിയറപ്രവര്‍ത്തകര്‍ എന്നിവരെ തീരുമാനിക്കുന്നു...ഈ സ്ഥിതി മാറിയെന്നു മങ്കൊമ്പ് പറയുമ്പോള്‍, കൃത്യതയോടെ സിനിമയൊരുക്കിയ ഒരു കാലത്തിന്‍റെ ഭാഗമായതിന്‍റെ കരുത്തുണ്ട് ആ വാക്കുകളില്‍. കൃത്യമായ പ്രിപ്പറേഷന്‍ വേണം. വരികളെഴുതുമ്പോഴും, കഥ മനസിലാക്കി അതിനനുസരിച്ചു വേണം എഴുതാന്‍. ഇപ്പോള്‍ ട്യൂണ്‍ ഇട്ടശേഷം, ഫില്‍ ഇന്‍ ദ് ബ്ലാങ്ക്സ് പോലെ, വരികളെഴുതുന്ന സ്ഥിതിയായി, മങ്കൊമ്പ് പറയുന്നു. ജോലിയോടുള്ള അര്‍പ്പണം അതാണു മുഖ്യം.

സിനിമാകാലത്തിനു തുടക്കമിട്ട മദ്രാസ് ജീവിതം അവസാനിപ്പിച്ച്, മങ്കൊമ്പ് കൊച്ചിയിലെത്തിയിട്ടു മൂന്നു വര്‍ഷമാകുന്നതേയുള്ളൂ. വൈറ്റിലയ്ക്കടുത്തെ വീട്ടില്‍ ഭാര്യ കനകമ്മയ്ക്കൊപ്പം താമസം. മൂന്നു മക്കള്‍.

മദ്രാസില്‍ നിന്നുള്ള മടക്കം ഒരിക്കലും സിനിമാജീവിതത്തിന്‍റെ വിരാമമല്ല. ഇപ്പോഴും കര്‍മമേഖലയില്‍ സജീവമായി തുടരുന്നു. കുട്ടനാടിന്‍റെ നന്മയില്‍ നിന്ന് അനന്തപുരിയിലേക്കും, സിനിമയുടെ സങ്കേതമായ മദ്രാസിലേക്കും, തിരികെ നാട്ടിലേക്കും...

അഭിമുഖത്തിന്‍റെ ഔപചാരികത അവസാനിക്കുമ്പോഴും, അനുഭവങ്ങളുടെ റീല്‍ അവസാനിക്കുന്നില്ല, പാതി വഴിയില്‍ പൊട്ടി വീഴുന്നുമില്ല. അടുത്ത രംഗത്തിന്‍റെ ആകാംക്ഷയിലേക്ക് ഇപ്പോഴും മനസു തുറന്നിട്ടിരിക്കുകയാണ്, ലക്ഷാര്‍ച്ചനയുടെ ഗൃഹനാഥന്‍.

എഗൈന്‍ കാസര്‍കോട് കാദര്‍ ഭായി

2011-04-03T23:58:00.000-07:00

വര്‍ഷങ്ങള്‍ക്കു മുന്‍പ് ഇറങ്ങിയ മിമിക്സ് പരേഡിന്റെ തുടര്‍ച്ചയായി പിന്നീട് കാസര്‍കോട്‌ കാദര്‍ ഭായി എന്നൊരു ചിത്രം ഇറങ്ങി.

ആലുമൂടന്‍ കേന്ദ്ര കഥാപാത്രമായി വന്ന ആദ്യത്തെയും അവസാനത്തെയും ചിത്രം.

ആ രണ്ട് ചിത്രങ്ങളും തരക്കേടില്ലാതെ ഓടി.

വര്‍ഷങ്ങള്‍ കഴിഞ്ഞു , പല ചിത്രങ്ങള്‍ക്കും രണ്ടാം ഭാഗം ഇറങ്ങാന്‍ തുടങ്ങിയപ്പോ തുളസീദാസിനും അങ്ങനെ ഒരു കൊതി തോന്നി. രണ്ട് ചിത്രത്തിനും തിരനാടകം രചിച്ച കലൂര്‍ ഡെന്നിസ് നീണ്ട ഇടവേളയ്ക്കു ശേഷം

വീണ്ടും പേന കയ്യില്‍ എടുത്തു. പക്ഷെ ഡെന്നിസ് അന്ന് നിര്‍ത്തിയിടത് നിന്നും ആണ് തുടങ്ങിയത്, കാലം മാറിയതും തമാശയുടെ നിലവാരം മാറിയതും ഡെന്നിസ് ഓര്‍ത്തില്ല . അത് തന്നെയാണ് ഈ ചിത്രത്തിന്റെ പരാജയവും

കലാദര്‍ശന ഇപ്പോഴും തറക്കണ്ടം അച്ഛന്റെ മേല്‍നോട്ടത്തില്‍ തന്നെ ആണ് . അച്ഛന്റെ ഷഷ്ടിപൂര്‍ത്തി ആഘോഷത്തിനു പഴയ താരങ്ങള്‍ വീണ്ടും എത്തുന്നു (ജഗദീഷ് , അശോകന്‍ , ബൈജു) അവര്‍ക്ക് ജയിലില്‍ ഒരു പരിപാടി ലഭിക്കുന്നു. ആ ജയിലിലാണ് കാദര്‍ ഭായിയുടെ മകന്‍ കാസിം ഭായി (ബാബു ആന്റണി) കിടക്കുന്നത്. പരിപാടിക്ക് വന്ന അവരെ കാസിം ഭായി ആക്രമിക്കുന്നു . പിറ്റേ ദിവസം കാസിം ഭായി കൊല്ലപെടുന്നു . അതിന്റെ പുറകിലെ രഹസ്യം കണ്ടു പിടിക്കാന്‍ കാദര്‍ ഭായിയുടെ രണ്ടാം ഭാര്യയിലെ മകന്‍ അജ്‌മല്‍ (സുരേഷ് കൃഷ്ണാ ) എത്തുന്നു. ഒടുവിലെ പുകിലുകള്‍ എല്ലാം കഴിയുമ്പോള്‍ ജയില്‍ സൂപ്രണ്ടിന്റെ (സാദിക്ക്) സഹായത്തോടെ അജ്‌മല്‍ തന്നെയാണ് കൊന്നത് എന്ന് തെളിയുന്നു. ഇത്രയേ ഉള്ളു സംഭവം .
സുരേഷ് കൃഷ്ണാ വീണ്ടും വെറും സാദാ വില്ലന്‍ ആയി അവതരിക്കുന്നു. ചിരിപ്പിക്കാന്‍ വേണ്ടി ജഗദീഷും സംഘവും കാട്ടികൂട്ടുന്ന വിക്രിയകള്‍ ഒട്ടും തന്നെ ഏശുന്നില്ല. നായികയെ (രാധ വര്‍മ ) വളക്കാന്‍ വേണ്ടി ഇവര്‍ കാണിക്കുന്ന തമാശകള്‍ അരോചകമാണ് . ഒപ്പം സലിം കുമാര്‍ , സുരാജ് തുടങ്ങിയവര്‍ കൂടി തങ്ങളുടെ കഴിവിന്റെ പരമാവധി കുളമാക്കുന്നുണ്ട്

ചെല്ലക്കാറ്റിന്‍ എന്ന പഴയ ഗാനം (മിമിക്സ് പരേഡ് ) ഇടയ്ക്കിടെ ഓര്‍മിപ്പിക്കുന്ന പാശ്ചാത്തലസംഗീതം കൂട്ടിനുണ്ട് . രതീഷ്‌ വേഗ സംഗീതം നല്‍കിയ വയലാറിന്റെ ഗാനങ്ങള്‍ ഒന്നും തന്നെ മനസ്സില്‍ നില്കുന്നില. പാല്‍ കടല്‍ തിരയിടും നാട് എന്ന് കേരളത്തെ വര്‍ണിക്കുമ്പോള്‍ ആയ സംഗീതത്തില്‍ കേരള തനിമ ഒട്ടും തോന്നുന്നില്ല. പ്രത്യേകിച്ച് അഭിനയ മൂഹൂര്‍ത്തങ്ങള്‍ ഒന്നും ഇല്ല. കലാദര്‍ശനയില്‍ നിന്നും സിനിമയില്‍ എത്തി എന്ന് പറഞ്ഞു ജയറാം ഉള്‍പെടെ ഉള്ളവരുടെ പേരുകള്‍ പറയുന്നുണ്ട് ഈ ചിത്രത്തില്‍ . ജഗദീഷ് തമാശക്ക് വേണ്ടി തറയാകുന്നത് കാണുമ്പോള്‍ ലേശം വിഷമം തോന്നുന്നു. സിദ്ദിക് ഈ പനിക്കില്ല എന്ന് പറഞ്ഞത് കൊണ്ടു സാബു എന്ന കഥ പാത്രം ഒഴിവാക്കപെട്ടു തറക്കണ്ടം അച്ഛന്റെ സപ്തതിക്ക് ഒത്തു കൂടാം എന്ന് പറഞ്ഞാണ് പിരിയുന്നത് എല്ലാരും. അപ്പോള്‍ നാലാം ഭാഗവും പ്രതീക്ഷിക്കാം

തയ്യാറാക്കിയത് :ജയ്‌മോഹന്‍

കന്യാകുമാരി എക്സ്പ്രസ്സ്‌

2011-04-03T23:55:00.001-07:00

വളരെക്കാലത്തെ ഇടവേളയ്ക്കു ശേഷം ടി എസ് സുരേഷ് ബാബു സംവിധാനം ചെയ്ത ചിത്രമാണ്‌ കന്യാകുമാരി എക്സ്പ്രസ്സ്‌.

സത്തറാം സേട്ടിന്റെ (ഷാനവാസ്‌) മകള്‍ ഹേമയെ (സരയു) മൂന്നു പേര്‍ ചേര്‍ന്നു തട്ടിക്കൊണ്ടു പോകുമ്പോള്‍ സിനിമ തുടങ്ങുന്നു. അദ്ദേഹം അടുത്ത സുഹൃത്തായ മുഖ്യ മന്ത്രിയെ (ജഗതി ശ്രീകുമാര്‍ ‍) അറിയിക്കുന്നു . തട്ടിക്കൊണ്ടു പോയവര്‍ക്ക് വേണ്ടത് 25 കോടി വിലമതിക്കുന്ന രത്നങ്ങള്‍ ആണ് . അത് കൈമാറാന്‍ മുഖ്യ മന്ത്രി കണ്ടെത്തുന്നത് തന്റെ വിശ്വസ്തനായ ഡി ഐ ജി, സ്പെഷ്യല്‍ ബ്രാഞ്ച് മോഹന്‍ ശങ്കര്‍ ആചാരിയെ (സുരേഷ് ഗോപി) ആണ്. 25 ന് പകരം 26 കോടി വില വരുന്ന രത്നങ്ങള്‍ ആണ് സത്താറാം സേട്ട് മോഹന്‍ ശങ്കറിന് കൊടുക്കുന്നത്.

എന്നാല്‍ ഇടയ്ക്കു മോഹന്‍ ശങ്കറിനെ അടിച്ചു വീഴ്ത്തി വില്ലന്മാര്‍ രത്നം കൈക്കലാക്കുന്നു . ബോധം വീണ മോഹന്‍ ശങ്കര്‍ കാണുന്നത് തൊട്ടടുത്ത്‌ മരിച്ചു കിടക്കുന്ന ഹേമയെ ആണ്. തുടര്‍ന്നു മോഹന്‍ ശങ്കര്‍ പഠനത്തിനായി (പുള്ളിക്കാരന്‍ പുരാതനവാസ്തുശില്പകല പഠിക്കുന്നു കാരണം പേരുകേട്ട ശങ്കരന്‍ ആശാരിയുടെ പേരക്കുട്ടി ആണ്) കന്യാകുമാരിയില്‍ എത്തുന്നു . ആ മൂന്നു വില്ലന്മാരും അവിടെ ഉണ്ട് . തങ്ങളെ തിരക്കി വന്നതാണ്‌ എന്ന വിശ്വാസത്തില്‍ അവര്‍ മോഹന്‍ ശങ്കറിനെ വകവരുത്താന്‍ ശ്രമിക്കുന്നു . എന്നാല്‍ അവര്‍ ഓരോത്തര്‍ ആയി കൊല്ലപെടുന്നു. ഇതില്‍ വലിയ രഹസ്യം ഒന്നും സംവിധായകന്‍ സൂക്ഷിക്കുന്നില്ല. കന്യാകുമാരിയില്‍ ഉള്ള ഹന്നാ (ഗൌരി നന്ദന) ആണ് ഇതിനു പിന്നില്‍ . അവളുടെ അച്ഛനെ (ദിനേശ് പണിക്കര്‍ ) ദ്രോഹിച്ചതും സഹോദരങ്ങളെ കൊന്നതും ആണ് പ്രതികാരത്തിനു കാരണം. എന്നാല്‍ ഇവര്‍ ഒന്നും അല്ല യഥാര്‍ത്ഥ വില്ലന്‍ . കേന്ദ്ര കല്കരി സഹമന്ത്രിയുടെ മകന്‍ രഞ്ജന്‍ (ബാബു ആന്റണി) ആണ്. രഞ്ജന്‍ വരുമ്പോള്‍ ആണ് നമ്മളും കഥ അറിയുത്തത് . ഹേമയെ കൊല്ലിച്ചത് സത്തറാം സേട്ട് തന്നെ ആണ്. അതിനു വേണ്ടി ആണ് ഒരു കോടിയുടെ രത്നം അധികം കൊടുക്കുന്നത്. ഹേമ സേട്ടിന്റെ സ്വന്തം പുത്രി അല്ല ഇതിനെല്ലാം കൂടു നിന്നത് മോഹന്‍ശങ്കര്‍ ഗുരുതുല്യം കാണുന്ന മുഖ്യമന്ത്രിയും. എല്ലാം തിരിച്ചറിഞ്ഞ മോഹന്‍ ശങ്കര്‍ രണ്ജനെ ഇടിച്ചു പപ്പടം ആക്കി തിരുനെറ്റിക്ക് വെടി വച്ചു കൊള്ളുന്നു

ഒത്തിരി നല്ല ചിത്രങ്ങള്‍ തന്നിട്ടുള്ള ഡെന്നിസ് ജോസഫ്‌ ആണ് ഇതിനു വേണ്ടി തൂലിക ചലിപ്പിച്ചത് എന്നത് അത്ഭുതമാണ് . ഒരു ബലവും ഇല്ലാത്ത തിരക്കഥ . ഒരിക്കല്‍ പോലും സസ്പെന്‍സ് എന്ന സാധനം വരുന്നില്ല . തൊട്ടു മുന്നില്‍ നിന്ന് വെടി വച്ച ഹന്നയെ ആരും കാണുന്നില്ല . അവളുടെ ഫിന്ഗര്‍ പ്രിന്റ്സ് പോലും പോലീസിന് കിട്ടുന്നില്ല . അത്രയ്ക്ക് ഗതി ഇല്ലാത്ത പോലിസ് ആണോ കന്യാകുമാരിയില്‍ ? കൃഷ്ണ, ഭീമന്‍രഘു, കനകലത തുടങ്ങി ഒട്ടേറെ താരങ്ങള്‍ ഉണ്ടെങ്കിലും പൂഴി മണ്ണില്‍ തീര്‍ത്ത കൊട്ടാരത്തിന്റെ ഉറപ്പു മാത്രമേ ഈ ചിത്രത്തിന് ഉള്ളു .സുരേഷ് ഗോപി പതിവ് പോലെ സ്വന്തം മാനറിസങ്ങള്‍ കൊണ്ട് സമ്പന്നമാക്കിയ ഈ ചിത്രം ഒരു ശരാശരി വിജയം പോലും നേടിയില്ല

തയ്യാറാക്കിയത് : ജയ്‌മോഹന്‍

ഒരു തിര പിന്നെയും തിര

2011-04-03T22:44:00.004-07:00

ശ്രീജു വീണ്ടും ഇതാ നമുക്കായി ഒരു കണ്ടുപിടിത്തം നടത്തിയിരിക്കുന്നു. അറിയപ്പെടാത്ത ഒരു ‘ശ്യാം’ സംഗീതം നമ്മുടെ കണ്മുന്നില്‍ . ഒരു തിര പിന്നെയും തിര എന്ന ചിത്രത്തിലെ മുത്തിയമ്മന്‍ കോവില്‍ എന്ന ഗാനത്തിന്റെ സംഗീതമാണ് ശ്യാം നിര്‍വഹിച്ചിരിക്കുന്നത്. ഇതിലെ ദേവി നിന്‍ രൂപം എന്ന എം ജി ആര്‍ ഗാനം പ്രശസ്തവുമാണല്ലോ.

ശ്രീജുവിന് അഭിനന്ദനങ്ങളും, നന്ദിയും, സ്നേഹവും.....

എന്റെ ഗ്രാമം1

2011-04-01T02:34:00.002-07:00

എന്റെ ഗ്രാമം

2011-04-01T02:21:00.003-07:00

യേശുദാസിന് വിദ്യാധരന്‍ മാസ്റ്റര്‍ കല്പാന്തകാലത്തോളം പറഞ്ഞു കൊടുക്കുന്നു.

ശ്രീമൂലനഗരം മോഹന്‍ , വിജയന്‍ (തൊപ്പി വച്ചത്) കവിയൂര്‍ പൊന്നമ്മ- എന്റെ ഗ്രാമത്തിന്റെ സെറ്റില്‍
ആനയറ ഷാജി, ശ്രീമൂലനഗരം വിജയന്‍ (തൊപ്പി വച്ചത്) ,കാമറാമാന്‍ കൃഷ്ണന്‍ കുട്ടി, ശ്രീമൂലനഗരം മോഹന്‍

എന്റെ ഗ്രാമം സെറ്റില്‍ നിന്ന്

ഇതെല്ലാം മലയാളസംഗീതത്തിന് നല്‍കിയത് യുവ പത്രപ്രവര്‍ത്തകനും ശ്രീമൂലനഗരം മോഹനന്റെ മകനുമായ അനൂപ് മോഹന്‍ ആണ്. അനൂപ് മോഹനോടുള്ള നന്ദിയോടെ..................

സീറോ ബാബു

2011-03-31T03:03:00.002-07:00

ഓപ്പണ്‍ സീറോ വന്നു കഴിഞ്ഞാല്‍

വാങ്ങും ഞാനൊരു മോട്ടോര്‍ കാര്‍

ഇടത്തുഭാഗത്ത് ഒരുത്തിയെ ഞാന്‍

ഇരുത്തി ഓടിച്ചെത്തുമ്പോള്‍

ബ്രേക്കിടാന്‍ ഞാന്‍ മറന്നു പോകും

ജീവന്‍ വേണേല്‍ ഓടിക്കോ....

പി.ജെ ആന്‍റണിയുടെ ദൈവവും മനുഷ്യനുമാണ് അരങ്ങില്‍. ഈ പാട്ടു പാടുന്നത് സണ്ണി എന്ന കഥാപാത്രം. ഗാംബ്ലി ങ്ങില്‍ ഭാഗ്യം പരീക്ഷിക്കുന്ന ആളാണ് സണ്ണി. അരങ്ങത്ത് സണ്ണിയായി അഭിനയിക്കുന്നതും പാടുന്നതും എറണാകുളത്തുകാരന്‍ കെ. ജെ. ബാബു. പാട്ടു ഹിറ്റായി. ബാബു എവിടെച്ചെന്നാലും ഈ പാട്ടു പാടണം എന്നായി ആവശ്യം. ഓപ്പണ്‍ സീറോ പാട്ട് പാടണം. ആരാധകരുടെ ആവശ്യമേറി. സീറോ പാട്ടു പാടൂ ബാബൂ എന്ന തുടര്‍ച്ചയായ ആവശ്യങ്ങള്‍ക്കൊടുവില്‍ ഗായകന്‍റെ പേരു തന്നെ മാറി. കെ.ജെ. ബാബുവെന്ന ഗായകന്‍റെ, അഭിനേതാവിന്‍റെ, സംഗീതസംവിധായകന്‍റെ സര്‍നെയിമായി സീറോ. കപ്പട്ടിപ്പറമ്പില്‍ ജാഫര്‍ഖാന്‍ മുഹമ്മദ് ബാബു , പിന്നെയങ്ങോട്ട് അറിയപ്പെട്ടതു സീറോ ബാബു എന്ന്. ആലപിച്ച ഗാനത്തിലെ പദം, പേരിന്‍റെ അലങ്കാരമായി.

കേട്ടറിഞ്ഞിട്ടേയുള്ളൂ സീറോ ബാബു എന്ന്. ഇപ്പോള്‍ കാണുന്നു. എറണാകുളത്ത് പുല്ലേപ്പടിയില്‍ റെയില്‍വെ ട്രാക്കിന് ഓരം പറ്റി നടക്കുമ്പോള്‍ കാലത്തിന്‍റെ പാളങ്ങള്‍ പിന്നിട്ട് ഒരു നാടകഗാനം ഇരമ്പിയെത്തി
പറന്നു പറന്നു പറന്നു ചെല്ലാന്‍

പറ്റാത്ത കാടുകളില്‍

കൂടൊന്നു കൂട്ടി ഞാനൊരു

പൂമരക്കൊമ്പില്‍ ...

പാടവരമ്പരത്ത് പ്രേം നസീറിന്‍റേയും മിസ് കുമാരിയുടെയും ബ്ലാക് ആന്‍ഡ് വൈറ്റ് ദൃശ്യത്തില്‍ ഒരു തേക്കുപാട്ടിന്‍റെ ഈണമെത്തി,

മുണ്ടോന്‍ പാടത്ത് കൊയ്ത്തിനു വന്നപ്പോള്‍ ....

ഓര്‍മകള്‍ക്കു മേല്‍ ഹാര്‍മോണിയത്തിന്‍റെ ശ്രുതി. ഇതാ പറഞ്ഞും പാടിയും കേട്ടിട്ടുള്ള സീറോ ബാബു ആ ഹാര്‍മോണിയപ്പെട്ടിയുടെ പിന്നില്‍. നരവീണ മുടിച്ചുരുളുകള്‍ക്കു താഴെ സംഗീതം തുടിച്ചു നില്‍ക്കുന്നുന്നു. തീവണ്ടിയുടെ അകന്നകന്നു പോകുന്ന ശബ്ദത്തിനു പിന്നാലെ ബാബു പാടി,

പറന്നു പറന്നു പറന്നു ചെല്ലാന്‍ പറ്റാത്ത കാടുകളില്‍ ...

ഹാര്‍മോണിയപ്പെട്ടിയില്‍ വിരലുകളോടി. കാലത്തിനു കീഴടങ്ങിയിട്ടില്ല ശബ്ദം. തലമുറകളുടെ മനസില്‍ കൂടുകെട്ടിയ ഗാനം. വിരലുകള്‍ ഇടറുന്നില്ല, ശബ്ദം മുറിയുന്നില്ല.

പൊന്‍കുന്നം വര്‍ക്കിയുടെ കേരള തിയെറ്റേഴ്സിനു വേണ്ടി സ്വര്‍ഗം നാണിക്കുന്ന എന്ന നാടകത്തില്‍ ബാബു പാടി അഭിനയിച്ചതായിരുന്നു ഈ ഗാനം. വയലാറിന്‍റെ വരികള്‍ എല്‍പിആര്‍ വര്‍മ്മയുടെ സംഗീതം. നാടകത്തില്‍ നല്ല ഗാനങ്ങള്‍ക്കു സ്ഥാനമുണ്ടായിരുന്ന സമയം. കാലത്തെ അതിജീവിക്കുന്ന ഒരുപാടു നല്ല ഗാനങ്ങള്‍ പാടാന്‍, ഈണം നല്‍കാന്‍ അവസരം ലഭിച്ചിരുന്നു അദ്ദേഹത്തിന്.

പുല്ലേപ്പടിയിലെ മുറിയിലിരുന്നു കെ. ജെ. ബാബുവില്‍ നിന്നു സീറോ ബാബുവിലേക്കുള്ള പ്രയാണം പറഞ്ഞു തുടങ്ങി. ജീവിതത്തിന്‍റെ തുടക്കത്തിനും

തുടര്‍ച്ചക്കും ഇപ്പോള്‍ വര്‍ത്തമാനത്തിനും പശ്ചാത്തലമാകുന്നത് അറബിക്കടലിന്‍റെ റാണിയുടെ നാടു തന്നെ. ബാല്യം തീവ്രമായി വികൃതിയുടേതാണെന്നു തിരിച്ചറിഞ്ഞിരുന്നു ബാബു. പാട്ടു പാടി സ്കൂളിലെ അധ്യാപകരുടെ കണ്ണിലുണ്ണിയായപ്പോഴും, കുറുമ്പിന് കുറവൊന്നുമുണ്ടായിരുന്നില്ല. നന്നായി പാടുമെന്ന പരിഗണന അധികം നീണ്ടില്ല. ഒരിക്കല്‍ ഉമ്മയെ സ്കൂളിലേക്കു വിളിപ്പിച്ചു ഹെഡ്മാസ്റ്റര്‍ . മകന്‍റെ വികൃതിയെക്കുറിച്ചു വിശദമായി പറഞ്ഞു കൊടുത്തു. സ്കൂളില്‍ നിന്നു പുറത്താക്കും മുമ്പ് ഹെഡ്മാസ്റ്റര്‍ പറഞ്ഞു, ഇവനു സ്വന്തമായി വിദ്യ വരും. എങ്കിലും വിദ്യാലയത്തില്‍ നിന്നു പുറത്താക്കപ്പെട്ടപ്പോള്‍ ആ നാലാം ക്ലാസുകാരന്‍ വിഷമിച്ചു. അതൊരു പക്ഷേ തന്‍റെ വികൃതിക്കൊരു വേദി നഷ്ടപ്പെട്ട വിഷമമായിരിക്കാം. വിശാലമായ ഒരരങ്ങ് കാത്തിരിക്കുന്നുണ്ടായിരുന്നു, ജീവിതം കാത്തു വച്ചിട്ടുണ്ടായിരുന്നു.

പഠനം അവസാനിച്ചു. പക്ഷേ, ജീവിതം തുടരുന്നു. ബാനര്‍ജി റോഡിലെ ഡാന്‍സ് ആന്‍ഡ് മ്യൂസിക് ക്ലബ്ബിനു മുന്നിലായി സ്ഥിരം സങ്കേതം. അവിടെ ആളുകള്‍ പാടുന്നതു നോക്കിനില്‍ക്കും. ഒരു ദിവസം, ഒരു ഗാനത്തിന്‍റെ ഇടവേളയില്‍ തബലയടിക്കുന്ന ജേക്കബിനോടു ചോദിച്ചു, ഞാന്‍ ഒരു പാട്ട് പാടട്ടെ..? പാടുമോഎന്ന സംശയത്തോടെ ജേക്കബ് സമ്മതം മൂളി. അക്കാലത്തെ ഹിറ്റ് സിനിമ ആവാരയിലെ ആജാ വോ .....ലത മങ്കേഷ്കര്‍ പാടിയ ഗാനം. പന്ത്രണ്ടു വയസുകാരന്‍റെ പെണ്‍ശബ്ദത്തില്‍ പുറത്തുവന്നു, സദസ് ആസ്വദിച്ചു. വീണ്ടും പാടിച്ചു. അന്നു തന്നെ ക്ലബ്ബിന്‍റെ പരിപാടിയില്‍ ആദ്യവേദിയിലെത്തി ബാബു. പന്ത്രണ്ടാം വയസില്‍ ക്ലബ്ബിന്‍റെ പാട്ടുകാരനായി. സി. ഒ. ആന്‍റോ പോലുള്ള പ്രഗത്ഭരായ പലരുടേയുമൊപ്പം ഡ്യൂയറ്റ് പാടാന്‍ അവസരം കിട്ടി അക്കാലത്ത്. ജീവിതത്തിന്‍റെ അനുപല്ലവി ഈണങ്ങളോട് ഇഴ ചേര്‍ന്നു തുടങ്ങുകയായിരുന്നു അവിടെ.

ടികെസി വടുതലയുടെ കൈരളി കലാസമിതിയില്‍ സഹകരിക്കുന്ന കാലം. അഭിനയവും പാട്ടു കണ്ടു പി.ജെ ആന്‍റണി ചോദിച്ചു, നീ എന്‍റെ കൂടെ പോരുന്നോ..? ആന്‍റണിയുടെ അവകാശികള്‍ എന്ന നാടകത്തില്‍. ഒരു തെറിച്ച പയ്യന്‍റെ വേഷം. ആട്ടവും പാട്ടുമൊക്കെയായി മകന്‍ നടക്കുന്നതില്‍ ബാപ്പയ്ക്കു വലിയ താത്പര്യമില്ലായിരുന്നു. വീട്ടിലും കയറ്റില്ല. വീടിന്‍റെ വാതിലുകള്‍ ബാപ്പ കാണാതെ തുറന്നിട്ടിരുന്നത് ഉമ്മ. മകന്‍റെ ആട്ടവും പാട്ടും കുട്ടിക്കളിയല്ലെന്നു ബാപ്പ മനസിലാക്കിയ നാടകമായിരുന്നു അവകാശികള്‍. എറണാകുളത്തെ ടൗണ്‍ ഹാള്‍ ഗ്രൗണ്ടില്‍ (ഇപ്പോള്‍ ടൗണ്‍ ഹാള്‍ ഇരിക്കുന്ന സ്ഥലം) നാടകം അരങ്ങേറുന്നു. ബാബുവിന്‍റെ ബാപ്പ വന്നു. നാടകം കണ്ടു, പാട്ടു കേട്ടു അഭിനയം കണ്ടു. അന്നു ബാബു വീട്ടില്‍ ചെല്ലുമ്പോള്‍ സ്ഥിതി വ്യത്യസ്തമായിരുന്നു, ചെന്നുകയറിപാടെ ബാപ്പ അകത്തേക്കു നോക്കി പറഞ്ഞു, അവനെ വിളിച്ചു കയറ്റി ഊണു കൊടുക്ക്. ബാപ്പയുടെ അംഗീകാരത്തിന് അവകാശിയാവുകയായിരുന്നു ബാബു.

സ്വര്‍ഗം നാണിക്കുന്നു എന്ന നാടകം കഴിഞ്ഞതോടെ ശബ്ദത്തിനു ചെറിയ വ്യത്യാസം. ഫീമെയ്ലുമല്ല, മെയ്ലുമല്ല എന്ന അവസ്ഥ. ശബ്ദമാറ്റത്തിന്‍റെ കാലം പിന്നിടുകയായിരുന്നു. പിന്നീടു സങ്കേതം കൊച്ചിയിലെ ആസാദ് മ്യൂസിക് ക്ലബ്ബായി. ജോബ് മാസ്റ്റര്‍, പോള്‍ വെറ്റിലക്കാടന്‍ (സംവിധായകനും നടനുമായ ലാലിന്‍റെ പിതാവ്), എം.എം. ലോറന്‍സ് അങ്ങനെ വലിയൊരു സഹൃദയസംഘം വന്നു പോകുന്ന ക്ലബ്ബ്. അപ്പോഴും പാട്ട് ഉണ്ടായിരുന്നു കൂടെ. കഷ്ടപ്പാടിന്‍റെ കാലം. കുറച്ചുനാളിനു ശേഷം പി.എ. തോമസ് വഴി ആദ്യസിനിമയിലേക്കുള്ള അവസരം വരുന്നു. കുടുംബിനി എന്ന ചിത്രത്തിലൊരു പാട്ടുപാടി.

കണ്ണിനു കണ്ണിനെ
കരളിനു കരളിനെ
തമ്മില്‍ അകറ്റി നീ
കനിവറ്റ ലോകമേ....

പോര്‍ട്ടര്‍ കുഞ്ഞാലിയില്‍ ശ്രീമൂലനഗരം വിജയന്‍റെ വരികള്‍ക്കു ബാബുരാജ് സംഗീതം പകര്‍ന്ന ഗാനം, വണ്ടിക്കാരന്‍ ബീരാന്‍കാക്ക...ഭൂമിയിലെ മാലാഖ എന്ന ചിത്രത്തിലെ മുണ്ടോന്‍ പാടത്തു കൊയ്ത്തിനു വന്നപ്പോ... ബാബുവിന്‍റെ ശബ്ദം ആസ്വാദകരിലെത്തി. സുബൈദ, അവള്‍, ഇത്തിക്കരപ്പക്കി തുടങ്ങിയ ചിത്രങ്ങളിലും ബാബു പാടിയിട്ടുണ്ട്. വിസ എന്ന ചിത്രത്തില്‍ മമ്മൂട്ടിയും മോഹന്‍ലാലും പാടി അഭിനയിച്ച, സംഗതി കുഴഞ്ഞല്ലോ, തലയൊക്കെ കറങ്ങണൂ പടച്ചോനേ എന്ന ഗാനവും ബാബുവിന്‍റെ ശബ്ദം രേഖപ്പെടുത്തി. സത്യന്‍ അന്തിക്കാടിന്‍റെ ആദ്യചിത്രമായ കുറുക്കന്‍റെ കല്യാണം, ഫാസില്‍ ചിത്രമായ മറക്കില്ലൊരിക്കലും എന്നീ സിനിമകളുടെ സംഗീതസംവിധായകനും സീറോ ബാബുവായിരുന്നു. ചില സിനിമകളില്‍ തന്മയത്വത്തോടെ അഭിനയിക്കുകയും ചെയ്തു. അഞ്ചു സുന്ദരികള്‍, മാടത്തെരുവി കൊലക്കേസ്, തോമാസ്ലീഹ, സിദ്ധിക്ക്-ലാല്‍ സംവിധാനം ചെയ്ത കാബൂളിവാലയില്‍ പിറന്നൊരീ മണ്ണും എന്ന ഗാനം ആലപിക്കുന്ന ഗായകന്‍, രണ്ടാം ഭാവത്തിലെ ഗസല്‍ഗായകന്‍. വിദേശത്തടക്കം നിരവധി വേദികളില്‍ എല്ലാത്തരം ഗാനങ്ങളും പാടി. ഇപ്പോഴും പാടിക്കൊണ്ടേയിരിക്കുന്നു. 2005ല്‍ കേരള സംഗീത നാടക അക്കാഡമിയുടെ അംഗീകാരവും ബാബുവിനു ലഭിച്ചിരുന്നു.

ഹാര്‍മോണിയപ്പെട്ടിയുടെ മുകളില്‍ വെള്ളപേപ്പറില്‍ വരികള്‍ ഇപ്പോഴും കാത്തു കിടക്കുകയാണ്, ഈണങ്ങള്‍ ഇണ ചേരാന്‍ . പുതിയൊരു ആല്‍ബത്തിനായി വരികള്‍ ചിട്ടപ്പെടുത്തുകയാണ്. ഇന്നും സംഗീതത്തിന്‍റെ സിദ്ധി നഷ്ടമായിട്ടില്ല. ശബ്ദം ഇടറിയിട്ടില്ല. ഓര്‍മകളില്‍ അഭിരമിക്കുന്നില്ല ബാബു. കാലത്തിന്‍റെ മാറ്റം തിരിച്ചറിയുന്നുണ്ട്. പാട്ടിന്‍റെ മരക്കൊമ്പുകളില്‍ ഇപ്പോഴും പൂക്കള്‍ വിരിഞ്ഞു തന്നെ നില്‍ക്കുന്നു. അവിടെ കൂടുകൂട്ടാന്‍ കൊതിച്ച് പറക്കാന്‍ വെമ്പി നില്‍ക്കുന്നു ഈണങ്ങള്‍ . ആ മുറിയില്‍ നിന്നിപ്പോഴും ഹാര്‍മോണിയത്തിന്‍റെ സംഗീതം. സീറോ ബാബു വീണ്ടും പാടുകയാണ്...